Էրդողանը «Նոր Թուրքիայի» նպատակների մասին

Թուրքական T24 առցանց թերթի փոխանցմամբ՝ Թուրքիայի նախագահ Ռեջեփ Էրդողանը հայտարարել է, որ ահաբեկչական ակտերը Թուրքիային չեն կարող շեղել իր որդեգրած ուղուց. «Նոր Թուրքիայի առաքելությունը 2023, 2053 և 2071 թվականների հետ կապված նպատակներն են։ Ներկա դրությամբ մենք աշխարհի ամենազարգացած 20 երկրների թվում ենք և զբաղեցնում ենք 17-րդ տեղը։ Ոչ վաղ անցյալում մենք Անթալիայում հյուրընկալեցինք G20-ի գագաթնաժողովը: Այս հողերում չկա ու չի կարող լինել այլ պետություն՝ բացի Թուրքիայի Հանրապետությունից։ Չի կարող լինել նաև որևէ ինքնակառավարում։ Գոյություն ունի միասնական պետություն»։ Հիշեցնենք, որ ավելի վաղ Էրդողանը երիտասարդների հետ հանդիպման ժամանակ հայտարարել էր. «Մենք կհասնենք 2023 թվականի հետ կապված մեր նպատակներին, իսկ մեր երեխաները և թոռները՝ 2053 և 2071 թվականների հետ կապված նպատակներին»: