Արտակ Հերիքյանը պարզաբանում է, թե ինչու է հեռացել Հանրայինից
Երեկ հայտնի դարձավ, որ Հանրային հեռուստաընկերության լրատվական-քաղաքական հաղորդումների տնօրեն Հարություն Հարությունյանը եւ «Օրակարգ» լրատվական ծառայության ղեկավար-պրոդյուսեր Արտակ Հերիքյանն իրենց դիմումների համաձայն ազատվել են զբաղեցրած պաշտոններից։ Նրանց հետ ազատման դիմումներ են ներկայացրել նաեւ որոշ լրագրողներ, այդ թվում` «Օրակարգ» լրատվական ծրագրի մեկնաբան Լարա Առաքելյանը եւ նույն հաղորդաշարի հաղորդավար Տարոն Կոխլիկյանը: Նաիրա Զոհրաբյանը զգուշացրեց մշակույթի նախարարին «Իրավունքը» Արտակ Հերիքյանից փորձեց պարզել, թե արդյո՞ք իր սեփական դիմումի համաձայն է թողել աշխատանքը. «Ինքս հարմար չեմ գտել այնտեղ աշխատելու համար, պարզապես ասել են, որ այլեւս ինձ չեն տեսնում այդ ծառայությունում: Հասկանալով այդ առաջարկը, հորդորը իմ սեփական կամքով աշխատանքից ազատվելու դիմում եմ գրել»,-նշեց Արտակ Հերիքյանը եւ ընդգծեց, որ այս պահին դեռեւս այլ տեղից աշխատանքի առաջարկ չի ստացել: Անդրադառնալով իր հետ միասին Հանրային հեռուտաընկերությունը լքած երկու հաղորդավարներին, Ա. Հերիքյանը փաստեց, որ Լարա Առաքելյանը եւ Տարոն Կոխլիկյանը իր հետ էին միացել Հ1-ի լրատվական թիմին. «Ինձ համար ցավալիորեն նրանք էլ աշխատանքից ազատվելու որոշում կայացրին, չէի ցանկանա, որ թողնեին իրենց աշխատանքը, բայց խելացի են եւ մեծ ապագա է սպասվում նրանց»,-ասաց Ա. Հերիքյանը: Անդրադառնալով իր հետագա գործունեությանը, մեր զրուցակիցը փաստեց, որ հեռուստատեսությունը երբեք չի թողնի. «Իմ մեջ ունեմ հեռուստատեսությունից մեկ մաս: Սիրածս մասնագիտությանը հենց այնպես հրաժեշտ չեմ տա, հեռուստատեսությունը թողել եմ, սակայն հեռուստալրագրությունը չեմ կարող թողնել: Դեռ կհանգստանամ, այնուհետեւ կորոշեմ անելիքներս»,-եզրափակեց Արտակ Հերիքյանը: Հ.Գ.- Ի դեպ, այն, որ Հանրային հեռուստաընկերության լրատվականի գլխին սեւ ամպեր էր կուտակվել, ակնհայտ դարձավ դեռեւս օրեր առաջ, երբ Ազգային ժողովում Հանրային հեռուստաընկերության տնօրեն Մարգարիտա Գրիգորյանը հանկարծ երկրի իրավիճակի փոփոխության արդյունքում, դարձավ շփվող: Եթե նախկինում նա պատրաստակամ չէր հարցերին պատասխանել, այս անգամ նա նույնիսկ ժպտում էր: Ավելին` լրագրողների այն դիտարկմանը, թե ինչու Հանրային հեռուստատեսությունը երկար ժամանակ չէր լուսաբանում Փաշինյանի քայլարշավը, Գրիգորյանն արձագանքել էր, թե իր գործառույթների մեջ չի մտնում թելադրել լրատվական ծառայության ղեկավարին, թե ինչ պետք է ցուցադրել՝ նշելով, որ վերջինս ինքն է որոշում իր աշխատանքի քաղաքականությունը։ Այնպես որ, հենց այս համատեքստում էլ պետք է ընկալել այն, ինչ տեղի ունեցավ: Չի բացառվում, որ Ա. Հերիքյանն ու մյուսները, պարզապես, «սիրո ու հանդուրժողականության հեղափոխության» վենդետայի հետեւանքում մնացին անգործ:
Հետևեք մեզ Viber-ում
