Մանե Թանդիլյանը «տեղը դրեց» Նիկոլ Փաշինյանին
Մանե Թանդիլյանն աշխատանքի և սոցիալական հարցերի նախարարի պաշտոնից հրաժարականից հետո «Ազատության» ֆեյսբուքյան ասուլիսի ընթացքում հայտարարեց, որ ոչ միայն նախարարի պաշտոնից է հրաժարվել, այլ նաև դադարեցրել է անդամակցությունը «Լուսավոր Հայաստան» կուսակցությանը: Հարցին, թե ինչու է հրաժարական տալու մասին որոշում կայացրել, Մանե Թանդիլյանն ասաց. «Հունիսի 11-ին Կառավարության նիստի ընթացքում կուտակային կենսաթոշակային համակարգի վերաբերյալ այնպիսի որոշում կայացվեց, որը հակասում էր այն նախագծին, որը ես էի ներկայացրել: Ըստ իմ ներկայացրածի՝ պարտադիր բաղադրիչը պետք էր հետաձգել մեկ տարով, այս ընթացքում էլ տեղի էր ունեցել քննարկում, որի ընթացքում ես տեսնում էի հնարավորություն համակարգը դարձնել այնպիսին, որ այն դառնար գրավիչ քաղաքացիների համար, համակարգ, որը կներառեր նաև բազմաթիվ քաղաքացիների առաջարկություններ: Ես կարծում եմ, որ այդ հնարավորությունը կար: Կային մեխանիզմներ, որոնցով կուտակային համակարգը կարելի է դարձնել ընդունելի, այս առումով իմ նախագիծը չարժանացավ Կառավարության հավանությանը, այլ նախագիծ առաջացավ, թեպետ փոխվեցին տոկոսադրույքները, բայց պարտադիր բաղադրիչն ամբողջությամբ կկիրառվի»,-ասաց Թանդիլյանը: Հարցին, թե կա արդյոք վիրավորվածության զգացում, Մանե Թանդիլյանն ասաց, որ դա այն կատեգորիան չէ, որով ինքն առաջ է շարժվում. «Իրականությունն այն է, որ ես ունեմ պատկերացումներ, և դրանք չեն համապատասխանում այսօրվա Կառավարության տեսլականին»:
Հետևեք մեզ Viber-ում
