Ավագ դպրոցն իր դերակատարությունը չունեցավ.նախարար

«Ես արդեն ասել եմ, որ այս տարի բուհերի համար ճգնաժամային է և պետք է փորձենք այս իրավիճակից դուրս գալ: Մի քանի օրից կհրապարակվեն բուհերի ֆինանսական աուդիտների արդյունքները»,-լրագրողների հետ զրույցում  ասել է Կրթության և գիտության նախարար Արայիկ Հարությունյանը: «Իսկապես այդ խնդիրը կա, բուհերի հետ շատ լուրջ խոսակցություն պետք է ունենանք: Թեև այդ ընդունելությունը 6 տարի շարունակ հետապնդելու է բուհերին, իսկ դա ազդելու է դրույքների վրա, ծանրաբեռնվածությունների վրա։ Դեմոգրաֆիան, իհարկե, դրա վրա ազդում է, բայց պետք է ամեն ինչ անել, որ որակի վրա դա չազդի»,- խոսելով բուհերում դիմորդների քիչ քանակի և մի շարք ֆակուլտետների ցածր որակի մասին՝ Արայիկ Հարությունյանը նշել է, որ բուհերի հետ շատ լուրջ խոսակցություն պետք է ունենալ այդ առումով։ Հարցին՝ հնարավո՞ր է, որ դիմորդների թվի քիչ լինելը պրոֆեսորադասախոսական կազմի կրճատման բերի, Արայիկ Հարությունյանը պատասխանել է. «Հույս ունեմ, որ դրան չի հասնի գործը»: «Ավագ դպրոցն իր դերակատարությունը չունեցավ։Մենք պետք է այնպես անենք, որ աշակերտը կրկնուսույցի կարիք չունենա։ Ավագ դպրոցի զարգացման վրա մի շարք գործոններ են ազդում, մասնավորապես, միջին մասնագիտական ուսումնական հաստատությունների թերի զարգացվածությունը, ծրագրերի բովանդակության բացակայությունը, մեթոդների թերի լինելը։ Այս ամենն ազդելու է որակի վրա, ուստի ճիշտ են նշում ծնողներն ու աշակերտները, որ երբեմն 12-րդ դասարանում անելիք չի լինում»,- ասել է Արայիկ Հարությունյանը: