«Եղե՞լ է, որ վերևից Ձեզ վրա ճնշում գործադրեն». Միքայել Մելքումյանը՝ ՍԴ դատավորի թեկնածուին

Ազգային ժողովում   Սահմանադրական դատարանի դատավորի ընտրության հարցի քննարկմանը «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանը հարցով դիմեց դատավորի թեկնածուին. «Ձեր ամբողջ պրակտիկայի ընթացքում ձեր վրա վերևից ճնշումներ եղե՞լ են, որ այս կամ այն որոշումը կայացնեք, որովհետև հայտնի է, որ մեր դատական համակարգում այդ պրակտիկան կա»։ Նշենք, որ դատավորների ընդհանուր ժողովի կողմից ՍԴ դատավորի թեկնածու է առաջaդրվել Ելիզավետա Դանիելյանը։ Ելիզավետ Դանիելյանն արձագանքեց. «Երբևէ դատական պրակտիկայի ընթացքում անձամբ ես նման իրավիճակի հետ չեմ առնչվել՝ վերևից կամ որևէ այլ մարմնի կողմից ազդեցության: Ինչ վերաբերում է խափանման միջոցների փոխվելուն, դա շատ նորմալ պրոցես է՝ նախատեսված դատավարական օրենսդրությամբ, որևէ գործառույթ չի իրականացվում օրենսդրությունից դուրս, հետևաբար ասել՝ հատուկ իրադարձություն է տեղի ունեցել, դրա համար է փոփոխվում, կարծում եմ՝ տեղին չէ: Պրոցեսները մտել են բնականոն ընթացքի մեջ և ուրախալի է, որ մարդիկ հայտնվում են ազատության մեջ»: Մ. Մելքումյանը նաև հետաքրքրվեց, թե ինչպե՞ս է նա գնահատում այն, որ վերջին շրջանում դատավարությունների արդյունքում խափանման միջոցները փոխվում են՝ այն դեպքում, որ մինչև իշխանափոխությունը նման բան չէր լինում։ «Կարծում եմ՝ շատ նորմալ պրոցեսներ են, բոլոր այդ պրոցեսները նախատեսված են դատավարական օրենսդրությամբ, որևէ գործառույթ օրենքից դուրս չի իրականացվում, ասել, որ հատուկ իրադարձություն է տեղի ուենցել, դրա համար են փոխում խափանման միջոցները, այդպես չէ։ Պարզապես դատարանները չէին կարողանում իրականացնել դատական նիստերը, հիմա հանդարտվել են կրքերը, պրոցեսները մտել են բնականոն ընթացքի մեջ, ու շատ ուրախալի է, որ խափանման միջոցները փոխվում են»,- ի պատասխան՝ ասաց Ե. Դանիելյանը։