Դարձ ի շրջանս յուր

Այսպիսով՝ քաղաքական վերադասավորումները եւ 2017-ի խորհրդարանական ընտրություններին ընդառաջ խմորումների մեկնարկն արդեն տրված է։ Քաղաքական ուժերից ոմանց մոտ սրացումներ են նկատվում, ոմանց մոտ էլ կտրուկ փոփոխություն նախկին կուրսի։ Այսօր խորհրդարանի մեկնարկին պարզ դարձավ, որ Բարգավաճ Հայաստան կուսակցությունը, որից փշրանքներ են մնացել եւ այժմ էլ կուսակցությունից զանգվածային արտահոսք է նկատվում, որոշել է խիստ ընդդիմություն խաղալ։ Այդ մասին եղան թե բացահայտ հայտարարություններ, թե նման պահվածք դրսեւորվեց ԱԺ ամբիոնից։ ԲՀԿ-ն, որը ոչ վաղ անցյալում աջակցեց Սերժ Սարգսյանի նախաձեռնած սահմանադրական փոփոխությունները, որի ղեկավար կազմը ակնհայտ երջանիկ դեմքով մասնակցեց նախագահականի ֆոտոսեսիային, որը ողջ հոգով կողմ քվեարկեց Հովիկ Աբրահամյանի կառավարության ներկայացրած բյուջեին, որի ներկայացուցիչներն անթաքույց ծափահարում էին իշխանության ներկայացուցիչների ելույթներին, այժմ որոշում է կայացրել, որ ինքն այլեւս պետք է հավատարիմ մնա փաստացի ընդդիմադիր կոչումին։Ավելին կուսակցության ղեկավար Նաիրա Զոհրաբյանը այսօր լրագրողների հետ զրույցում հայտարարեց, որ «Բարգավաճ Հայաստան»-ը որպես «մաքուր, ինքնազտված, առողջացված քաղաքական թիմ ընդդիմադիր իր օրակարգով մասնակցելու է 2017-ի խորհրդարանական ընդդիմություններին»։ Լրագրողները հետաքրքրվեցին, թե կունենա՞ ԲՀԿ-ն հնարավորություն հաղթահարել խորհրդարան մուտք գործելու արգելքը, Զոհրաբյանը պատասխանեց. «5 տոկոս շեմի մասին խոսելը ես համարում եմ ծիծաղելի: Ես ձեզ վստահեցնում եմ, որ «Բարգավաճ Հայաստան»-ը շատ լուրջ ներկայություն է ունենալու 2017-ի խորհրդարանում»: Ինչ վերաբերում է ընտրություններին դաշինքով կամ առանց դաշինքի մասնակցելուն, ապա Զոհրաբյանն ասաց, որ այդ հարցը դեռ չի քննարկվել և մտադիր են այդ մասին որոշում կայացնել սեպտեմբերին կայանալիք կուսակցության համագումարում: «Այս պահին հակված ենք միայնակ մասնակցել ընտրություններին, բայց կրկնում եմ, դեռ վաղ է նման վերջնական տեսակետ հնչեցնելը»։ Իսկ ԲՀԿ-ական Միքայել Մելքումյանը, որը ոչ վաղ անցյալում ԲՀԿ-ից վերջերս դուրս եկած Վահան Բաբայանի հետ այցելել էր կառավարություն, որպեսզի այնտեղ բողոք ներկայացնի, թե ինչպես է, որ հինգ հոգանոց դաշնակցության հետ կոալիցիան են կազմում, ԲՀԿ-ի հետ՝ ոչ, այսօր ցնցեց ԱԺ ամբիոնը իր քննադատական ելույթով։ Միքայել Մելքումյանը ՀԾԿՀ ղեկավար Ռոբերտ Նազարյանին դիմում էր ամբիոնից բղավելով՝ «Լսեք, Ձեզ ինչ եմ ասում» կամ «Եթե աշխատել չգիտեք, ասեք՝ սովորացնենք» եւ նմանատիպ այլ արտահայտություններով։Փաստորեն ԲՀԿ-ի համար այլ ելք չի մնում, քան անցնել խիստ ընդդիմության դիրքերի վրա , միայն թե հայտնի չէ, թե այդ վերափոխման արդյունքում քանի մարդ կմնա իրենց շարքերում։ Հատկանշական է, որ ԲՀԿ խմբակցության պատգամավոր անկուսակցական Վահե Հովհաննիսյանը, ով առաջիկայում թերեւս կանդամակցի Վարդան Օսկանյանի նոր կուսակցությանը, լրագրողների հետ զրույցում հայտարարեց, թե Օսկանյանը «կխառնի բոլորի խաղաքարտերը»։ Ինչպես երեւում է, ԲՀԿ-ում բավականին շուտ հետեւություն արեցին։ Անի Սահակյան