Որոշ դպրոցներում լրացուցիչ վճարովի ծառայություն մատուցելու ձևն անթույլատրելի է, ավելին՝ անօրինական. Անահիտ Բախշյան

Ստորև հրապարակածս նամակում ծնողի բարձրացրած խնդիրը, պարզվում է կա Կենտրոնի որոշ դպրոցներում, որոնց համարները չեմ նշում, բայց ծնողն իրավացիորեն բողոքում է ֆակուլտատիվ, այսինքն վճարովի լրացուցիչ պարապմունքները դասացուցակով իրականացնելու գործընթացի դեմ ու շատ իրավացի է: Հարգելի տնօրեններ, կարդացեք ծնողի նամակն ու ինքներդ ձեր որոշմանն ու գործողությանը տվեք գնահատական: Իմ կարծիքով, որոշ դպրոցներում լրացուցիչ վճարովի ծառայություն մատուցելու ձևը, որը ստորև նամակում նկարագրել է ծնողը, անթույլատրելի է, ավելին՝ անօրինական: Հուսամ նոր ուսումնական տարում բոլոր այն դպրոցներում, որտեղ լրացուցիչ վճարովի ծառայություններ մատուցելու այս մեխանիզմն է դրված, այլևս չի գործելու: Խնդրեմ ծնողի նամակը. <Հարգելի տիկին Բախշյան , Մեր դպրոցում Կենտրոն համայնք 2 դասարանից սկսած ամեն տարի մի առարկա ֆակուլտատիվ են մտցնում և այդ ֆակուլտատիվի պարապմունքը անում են ոչ թե դասերից հետո, այլ ասենք 2,3 կամ 4 դասաժամին: Այդ ֆակուլտատիվի համար մենք պայմանագիր ենք ստորագրում, որ համաձայն ենք ամեն ամիս վճարել 2000 դրամ: Ճիշտ է , մեզ ասում են , որ կարող ենք հրաժարվել եթե չենք ուզում, բայց պատկերացրեք, եթե ես չստորագրեմ , ապա իմ երեխան ինչ պետք է անի այդ դասաժամին, էլ չասեմ, որ եթե դա մաթեմատիկայի ֆակուլտատիվ է, ուսուցիչը 1 դաս առաջ է անցնելու, երեխան հետ մնա ծրագրից: Բոլոր տեսակի ֆակուլտատիվները թող անեն դասերից հետո, ինչպես որ եղել է միշտ:>