«Ձեր դիմաց կանգնած են ոչ թե հանցագործներ, այլ՝ հանցագործությունը կանխած ազգի նվիրյալներ». Պավել Մանուկյան

«Սասնա ծռեր»-1 գործով այսօրվա դատական նիստում դատարանը՝ բավարարելով պաշտպանական կողմի միջնորդությունը, նիստերի դահլիճ վերադարձրեց այնտեղից հեռացված ամբաստանյալներին: Պաշտպան Մուշեղ Շուշանյանը՝ պաշտպանյալներին դատարանի դահլիճ վերադարձնելու միջնորդությամբ հանդես գալով՝ նշեց, որ առանց ամբաստանյալների հնարավոր չէ դատավարությունն իրականացնել կառուցողական մթնոլորտում: Անգամ պաշտպանների մասնակցության պարագայում խախտվում է իրենց պաշտպանյալների պաշտպանության իրավունքը, նշեց փաստաբանը: Նշվեց նաև, որ ամբաստանյալները ցանկություն ունեն հանդես գալ հայտարարություններով: Մեղադրող կողմը նշեց, որ տասը ժամով դատական նիստերի դահլիճից հեռացնելու դատական սանկցիայի կիրառումը բխում է օրենքից, այդուհանդերձ չառարկեց որոշումը վերանայելու ու ամբաստանյալներին դատական նիստերի դահլիճ վերադարձնելու դեմ: Դատարանը բավարարեց միջնորդությունը՝ նշելով, որ դատարանը դատավարությունը կառուցողական մթնոլորտում ու իրավական դաշտում անցկացնելու կողմնակիցն ու երաշխավորն է: Վարուժան Ավետիսյանը՝ նիստերի դահլիճ վերադարձվելուց հետո գոհունակություն հայտնեց դատավարությունը կառուցողական հուն բերելու տրանադրվածության կապակցությամբ: Խոսքն ուղղելով զոհերի հարազատներին, նա նշեց, որ անդրադատռնում է բոլորի համար ցավոտ հարցի: Ըստ Վ.Ավետիսյանի, ռեժիմը ջրբաժան էր գծել ժողովրդի մեջ՝ բաժանելով ժողովրդին ճնշողների ու ճնշվողների, բացի որոշում կայացնողներից՝ երկու կողմում էլ բոլոր անձինք եղել են զոհեր: Նա նշեց, որ ընդվզումը երբեմն նաև ցավալի հետևանքներ է առաջացնում՝ հավելելով, որ իրենք ի սկզբանե ցավ են ապրել զոհերի համար, հարգել են զոհված գնդապետի հիշատակը: Առաջիկայում բոլորն էլ կհասկանան, թե ինչ է տեղի ունեցել, ասաց նա՝ հայտարարելով, որ զոհերից մեկի մասով «մենք կապ չունենք, մյուսին էլ ուղղակի առնչություն չունենք»: Հայտարարությամբ հանդես եկավ նաև Պավել Մանուկյանը: «Ձեր դիմաց կանգնած են ոչ թե հանցագործներ, այլ հանցագործությունը կանխած ազգի նվիրյալներ», ասաց նա՝ հավելելով՝ պիտի կարողանալ ազգային հերոսին ու դավաճանին իրարից զանազանել:

Փաստինֆո