Ինչու ազատ արձակեցին Մասիսի քաղաքապետին
Քաղաքացիական անհնազանդության դեմ ապրիլի 22-ին Էրեբունիում զանգվածային անկարգություններ կազմակերպելու եւ մասնակցելու գործով ձերբակալված Մասիսի քաղաքապետ Դավիթ Համբարձումյանի ազատ արձակման փաստը այդպես էլ մնում է չբացահայտված՝ ինչու ձերբակալեցին, որ ազատեն։ Դատարանը նրա նկատմամբ որպես խափանման միջոց է ընտրել երկրից չհեռանալու մասին ստորագրությունը: Դատարանը նաեւ ոչ իրավաչափ է ճանաչել նրան ձերբակալելու քննիչի որոշումը: Դավիթ Համբարձումյանը նախկին ոստիկանապետ Վովա Գասպարյանի թիկնազորի պետ Արշակ Հակոբյանի փեսան է. երկուսն էլ հարեւանությամբ ապրում են Էրեբունի թաղամասում։ Մասիսի քաղաքապետի պաշտպան Տիգրան Աթանեսյանը հայտնել էր, որ Էրեբունիում տեղի ունեցած անկարգությունների գործով իր պաշտպանյալին երկու շինծու վկայի ցուցմունքի հիման վրա են մեղադրանք առաջադրել զանգվածային անկարգություններ կազմակերպելու և մասնակցելու մեջ. նա պնդում է, որ յութուբի տեսանյութը չի կարող ապացույց լինել: Տպավորություն է ստեղծվում, թե Քննչական մարմիններում ու դատարաններում գործում է կալանավորման կանխավարկածը, նկատում է պաշտպանը։ Քննչական կոմիտեն շարունակում է լռել ու հանրությանն անհայտ է՝ ի վերջո, ում որոշմամբ եւ ինչու է Համբարձումյանը «հանիրավի» ձերբակալվել։ Քաղաքապետը մի քանի օր է ազատության մեջ է, սակայն ձերբակալման որոշում կայացնող որեւէ անձ պատասխանատվության, կարգապահական տույժի չի ենթարկվել, ինչը տարօրինակ է։ Որքան էլ Նիկոլ Փաշինյանը հայտարարի, որ ինքը դատական իշխանության վրա որեւէ ազդեցություն չի ունենալու, ու չի բացառվում, որ քաղաքապետի հետ կապված այս պատմությունն էլ տեղի ունեցավ, որպեսզի փաստի Փաշինյանի այդ պնդումը, այդուհանդերձ փաստն այն է, որ եթե որեւէ անձ, պաշտոնյա, որը իր տեղում չէ ու սխալ որոշում է կայացրել, մնում է անպատիժ, նշանակում է համակարգում բարձիթողի վիճակ է։ Մյուս կողմից քաղաքապետի ձերբակալումն ու ազատ արձակումը կարող է հստակ նպատակներ հետապնդել։ Միգուցե առաջիկա օրերին մենք լսենք քաղաքապետի ազատման դիմումը իր պաշտոնից, որից պարզ կդառնա, որ նա ազատության մեջ հայտնվել է այդ պայմանով, որպեսզի ինքնակամ հեռանա քաղաքապետի աթոռից։ Չի բացառվում նաեւ, որ Դավիթ Համբարձումյանի եւ նոր իշխանության միջեւ փոխպայմանավորվածություն է ձեռքբերվել, որ քաղաքապետը չի մնում կալանավայրում, սակայն այսուհետ գործունեություն է ծավալում հանուն նոր Հայաստանի ու նոր իշխանությունների։ Հատկապես որ ձերբակալության օրերին պարզ դարձավ, թե համակիրների ինչպիսի հոծ բանակ ունի երիտասարդ քաղաքապետը եւ, առհասարակ, շնորհիվ աներոջ՝ մեծ ազդեցության շրջանակներ։ Միգուցե սա է լինելու այն միջոցը, որով Նիկոլ Փաշինյանը համայնքապետերին դարձնելու է յուրային։ Այսօր ցանկացած համայնքապետի վրա հաստափոր կոմպրոմատներ կարելի է դնել, բայց նրանց չպատժել միայն մեկ պայմանով, որ ծառայեն հանուն նոր Հայաստանի։ Անի Սահակյան
Հետևեք մեզ Viber-ում
