Արթուր Վանեցյանի սենսացիոն հայտարարությունը

ՀՀ Ազգային անվտանգության ծառայության տնօրեն Արթուր Վանեցյանն Աժ-ում պատասխանել է լրագրողների հարցերին: Նա նշել է, որ ՊԵԿ նախագահի տեղակալ Ռաֆիկ Մաշադյանը որպես վկա հրավիրվելու է ԱԱԾ եւ հարցաքննվելու է: Նրա խոսքով՝ Մաշադյանը հարցաքննվում է այն պատճառով, որովհետեւ ներկա է եղել այն հայտնի բանակցություններին, երբ որոշվել է սուպերմարկետներին տալ հնարավորություն 20 տոկոս եկամտահարկի փոխարեն վճարել 2 տոկոս հարկ: Հարցին՝ ինչո՞ւ չկան ձերբակալություններ, օրինակ, «Երևանի սիթի»-ի օրինախախտումների մասով, պատասխանել է. «Հակված չենք ռեպրեսիվ գործողություններ անենք ու մարդկանց ձերբակալենք, այլ՝ ովքեր պետությունից այս կամ այն ճանապարհով գումարներ են գողացել կամ շրջանցել, վերադարձնենք բյուջե: Իրավական առումով բարդ է ապացուցել՝ ո՞վ է կանգնած այս կամ այն բիզնեսի հետևում: Այն մարդիկ, որոնց անունով գրանցված են ձեռնարկությունները, քրեական պատասխանատվության կանչելն արդարացի չէ: Եթե վերականգնում են բյուջեի գումարները, պատասխանատվությունից ազատվում են»,- ընդգծել է Վանեցյանը: