Դերասանությունը ոստիկանությունում ժառանգական է
Արտիստիկ պահվածքով ու շոումեն Վովա Գասպարյանի հեռանալուց հետո ոստիկանության համակարգը մեծ կորուստ չի կրել, այն նոր դերասան է ձեռքբերել՝ ի դեմս նոր ոստիկանապետ Վալերի Օսիպյանը: Մի քանի շաբաթ է նա ոստիկանապետի պաշտոնում է, բայց իր արտիստիզմով, տրագիկոմեդիկ դերերով հասցրել է հիացնել իր հանդիսատեսին: Նա Վովա Գասպարյանին չի զիջում իր շարժ ու ձեւով, իր խոսքի առոգանությամբ ու մտքի թռիչքով: Պարոն Օսիպյանի գլխավոր դերակատարմամբ վերջին ներկայացումը մայիսի 30-ին, ներկայացման վայրը՝ ճանապարհային ոստիկանությունում, իսկ հանդիսատեսն այս անգամ հենց այդ ստորաբաժման անձնակազմն էր: Նա բեմում ինչպես ձուկը ջրում է, այնքան կատարյալ ու ինքնամոռաց՝ ակամայից մոռանալով, որ իր ներկայացումը հրապարակվելու է ու ոչ միայն ենթակաները, այլեւ հանրության լայն շերտերն են տեսնելու այն տրագիկոմեդիան, որով ապրում են հասարակության ու պետության համար կարեւորագույն այս համակարգում: Ներկայացման սյուժեն արտաքուս գրավիչ չէ՝ այն ճանապարհային ոստիկանության ծառայողներին տրված ցուցումների ու հանձնարարականների, դրանց կատարման ընթացքի, թերությունների ու բացթողումների մասին է, դիտարժան է դրա ներկայացման ձեւը: Առավել հետաքրքրական է այն դրվագը, երբ Վալերի Օսիպյանը ի խորոց սրտի խոստանում է, որ պետք է արվի ամեն ինչ ճանապարհային ոստիկանի հեղինակությունը բարձրացնելու ուղղությամբ: «Անկախ պաշտոնից, օլիգարխ կլինի, ով ուզում է լինի, եթե մեկը նեղում է, զանգեք, կգամ ձեր կողքը կկանգնեմ,ով ուզում ա լինի, ամենա օլիգարխը…»,- աքլորացած հայտարարում է Օսիպյանը, ակամայից մոռանալով, որ Հայաստանում թավշյա հեղափոխություն է կատարվել եւ այլեւս մարդակենտրոն համակարգերն ու գերատեսչական <<հերոսները>> տեղ չունեն նոր Հայաստանում: Ներկայացման կուլմինացիան Օսիպյանի դաստիարակչական ելույթն է, մանկապարտեզի դաստիարակի պես նա ոստիկանության աշխատակիցներին երկար-բարակ ու խրոխտ տոնով , կրկնություններով բացատրում է նրանց իրավունքներն ու պարտականությունները՝ տպավորություն ստեղծելով, թե այստեղ թերզարգացած մանուկներ են ու դժվար են ընկալում պարզ իրողությունները, մինչեւ հիմա չգիտեն էլ թե ինչ կարող են անել, ինչ ոչ. «Դուք եք օրենքը, բայց դա պետք է լինի օրենքի սահմաններում: Պետք է ստիպեք օրինախախտին, որ նա հարգի օրենքն ու Սահմանադրությունը»,-ասում է նա ու մատ թափ տալիս.«Այո, դուք ապացուցելու խնդիր ունեք հասարակությանը, այո ձեզանով է պայմանավորված հարգանքը ոստիկանության նկատմամբ: Մենք շեշտը դնում ենք արտաքին ծանուցման…բայց ձեզանով է պայմանավորված»: Իսկ հանդիսատեսի աչքերում այնքան կտտանք, այնքան հոգնություն կա, ի վերջո, հեշտ չէ տարիներ շարունակ դիտել մեկ դերասանի թատրոն: Անի Սահակյան
Հետևեք մեզ Viber-ում
