Որքա՞ն աշխատատեղ կկրճատվի արագաչափերի և տեսախցիկների հնարավոր դադարեցման դեպքում

Մոտ երկու շաբաթ առաջ ՀՀ վարչապետ Նիկոլ Փաշինյանը հայտարարել էր, որ պետք է մեխանիզմներ մտածեն՝ արագաչափերի ևտեսախցիկների գործունեության հետևանքով կուտակված պարտքը ներելու համար: Փաշինյանը նաեւ նշեց, որ նպատակահարմար կլինի ինչ-որ ժամանակաշրջանում դրանց գործունեությունը դադարեցնել, կասեցնել կամ առնվազն պետք է պրակտիկան դադարեցնեն, երբ հոծ գծեր շոշափելու համար մարդկանց տուգանում են: Մայիսի 23-ին ՀՀ Ճանապարհային ոստիկանության բարձրաստիճան պաշտոնյաները լրագրողների հետ ասուլիսի ժամանակ նշեցին, որ կդադարեցվի 01.01.2012թ. առ 31.12.2017թ. կայացված վարչական ակտերի կատարումը եւ կչեղարկվեն 13,7 մլրդ. դրամի չափով տուգանքները: ՀՀ ՃՈ պետի տեղակալ Արմեն Խաչատրյանը Armtimes.com-ի հարցերին ի պատասխան նշել է, որ տեսախցիկների եւ արագաչափերի գործունեությանը հիմնականում ներգրավված են «Security Dream» ընկերության աշխատակիցները: Ընդհանուր առմամբ կասեցման դեպքում ՃՈ-ից եւ «Security Dream»-ից կկրճատվի մոտ 600 աշխատատեղ: Իսկ կուտակված պարտքերի թիվը կազմում է 13.7 մլրդ դրամ, ինչը 2012 թվականից մինչ այժմ գոյացած պարտքերի 22 տոկոսն է կազմում: Մնացած 78 տոկոսը քաղաքացիները վճարել են: