«Facebook-ը մեծ դեր խաղաց մեր հեղափոխության ընթացքում». Նիկոլ Փաշինյան
ՀՀ վարչապետ Նիկոլ Փաշինյանը գերմանական Deutsche Welle-ին տված հարցազրույցում ասել է, որ իրենք մտադիր են երաշխավորել ժողովրդի, այլ ոչ անձանց ինչ-որ խմբի իշխանությունը, և ոչ մեկ չպետք է դրան խանգարի: Լրագրող Ժաննա Նեմցովան ՀՀ վարչապետի հետ խոսել է Հայաստանում հեղափոխության, Կրեմլի հետ հարաբերությունների և այն մասին, թե տեղի ունեցածում ինչ դեր են խաղացել սոցցանցերը: Նիկոլ Փաշինյանը նշել է, որ հեղափոխության ընթացքում օլիգարխները չկարողացան ազդել երկրում քաղաքական իրավիճակի վրա, որովհետև ժողովուրդն իշխանությունը վերցրեց իր ձեռքը և մտադիր չէ այն բաց թողնել: Նա նաև նշել է. «Հայաստանը խաղաղ երկիր է, մենք խաղաղասեր ժողովուրդ ենք: Ես հուսով եմ, որ դուք ոչ մի ագրեսիվություն չեք նկատել, օրինակ՝ Եվրամիության, ԱՄՆ-ի, Իրանի, Վրաստանի և այլ երկրների դեմ: Իհարկե, եթե անհրաժեշտ լինի, մենք կարող ենք մեզ պաշտպանել: Բայց մենք սերտ հարաբերություններ ունենք Ռուսաստանի հետ, և ես վստահ եմ, որ դրանք է՛լ ավելի խորը կդառնան: Մենք լավ հարաբերություններ ունենք ԵՄ-ի հետ, որոնք մտադիր ենք շարունակել զարգացնել: Մենք նաև մտադիր ենք զարգացնել մեր հարաբերություններն ԱՄՆ-ի, Իրանի, Վրաստանի և դրանով հետաքրքրված բոլոր երկրների հետ»,- ասել է Նիկոլ Փաշինյանը: Պատասխանելով ԵԱՏՄ-ի գագաթնաժողովի և Վլադիմիր Պուտինի թողած տպավորության մասին հարցին՝ Փաշինյանը նշել է, որ ԵԱՏՄ-ի գագաթնաժողովում շատ հաճելի մթնոլորտ էր: Նիկոլ Փաշինյանը նաև անդրադարձել է, թե ինչ դեր են ունեցել սոցիալական ցանցերը հեղափոխության ընթացքում: «Իմ քաղաքական գործունեության և բողոքի ցույցերի ընթացքում հեռուստատեսությունը փաստացիորեն փակ էր ընդդիմության համար: Շատ կարևոր է ունենալ ժողովրդի հետ շփման այլընտրանքային ալիք: Այժմ Facebook-ի իմ էջը մեծ լսարան ունի, որը կարելի է համեմատել հեռուստատեսության լսարանի հետ: Դա հանրության, քաղաքացիների հետ երկխոսության շատ արդյունավետ միջոց է: Իհարկե, Facebook-ը մեծ դեր խաղաց մեր հեղափոխության ընթացքում»,- ասել է նա: Մանրամասները՝ տեսանյութում:
Հետևեք մեզ Viber-ում
