Ավելի շատ պարտք ենք վերցրել, քան՝ ուղղել ենք կապիտալ ներդրումների.Ատոմ Ջանջուղազյան

Ազգային ժողովում Ֆինանսավարկային և բյուջետային հարցերի մշտական հանձնաժողովում անցկացվող ՀՀ  2017 թվականին պետական բյուջեի կատարողականի մասին քննարկումների ժամանակ   ՀՀ ֆինանսների նախարար Ատոմ Ջանջուղազյանը հայտարարեց.«2014 թվականից սկսած  բավարար չափով կապիտալ ներդրումներ չեն իրականացվել, որպեսզի լուծվեն տնտեսական զարգացումներին նպաստող խնդիրները»: «Հայաստանը որոշակի շեղում է ունեցել:  Ավելի շատ պարտք ենք վերցրել, քան՝ ուղղել ենք կապիտալ ներդրումների։ Պարտք ենք վերցրել ընթացիկ ծախսերի համար, որը կարճաժամկետ իմաստով տրամաբանական է։ Եթե գնայինք ընթացիկ ծախսերի կրճատմանը, մենք ավելի խորը խնդիրներ կունենայինք, իսկ միջին ժամկետում կամ երկարաժամկետ առումով այս մոտեցումը չի կարող դիտվել որպես օրինաչափ։ 2018-20 թվականների ծրագրի մեջ դրվել է հենց այդ քաղաքականությունը, որ մենք  2019 թվականին ունենանք հավասարակշռված կամ իրար մոտ պետական պարտքի հաշվին կապիտալ ծախսերի ֆինանսավորում, իսկ 2020-ին արդեն էական տարբերություն կունենանք, և մեր կապիտալ ծախսերը մեր ընթացիկ ռեսուրսների հաշվին կգերազանցեն մեր պարտքի հաշվին արած ծախսերը:2017 թվականին արտաքին վարկեր ստացվել են 280 միլիարդ դրամ և մարվել են 48 միլիարդ դրամ:Ընդամենը 6 միլիարդ 775 միլիոն ԱՄՆ դոլար է եղել պետական պարտքի չափը, որի մեջ կառավարության մասնաբաժինը կազմել է 6 միլիարդ 173 միլիոն ԱՄՆ դոլար։ Ընդհանուր պարտքի մակարդակը կազմել է 58․8 տոկոս, և դինամիկայի մեջ այն որոշակի աճ ունի,  դրանով է պայմանովորված նաև այն հարկաբյուջետային քաղաքականությունը, որն ընտրվել է, որի նպատակն է եղել կայունացնել պարտքը»։