Մխիթարյանը ցավակցել է «Բորուսիա»-«Մայնց» հանդիպման ժամանակ մահացած երկրպագուի ընտանիքին
Հայաստանի ֆուտբոլի ազգային հավաքականի և Դորտմունդի «Բորուսիա»-ի կիսապաշտպան Հենրիխ Մխիթարյանը ցավակցել է գերմանական Բունդեսլիգայի «Բորուսիա»-«Մայնց» հանդիպման ժամանակ մարզադաշտում մահացած երկրպագուի ընտանիքին: Խաղից հետո Հենրիխ Մխիթարյանը «Ֆեյսբուք»-ի իր էջում գրել է. «Շատ եմ տխրել՝ իմանալով մարզադաշտում մեր սիրելի երկրպագուի մահվան մասին: Իմ բոլոր մտքերն ու աղոթքները նրա ընտանիքի հետ են, ինչպես նաև այն երկրպագուի, ով այս պահին հիվանդանոցում է»: Դորտմունդի «Բորուսիա»-ի ֆեյսբուքյան պաշտոնական էջը հայտնել է, որ գերմանական Բունդեսլիգայի 25-րդ տուրի «Բորուսիա»-«Մայնց» հանդիպման ժամանակ սրտի կաթվածից մահացել է ակումբի երկրպագուներից մեկը: Եվս մեկ երկրպագու սրտի կաթվածով տեղափոխվել է հիվանդանոց:
Հետևեք մեզ Viber-ում
