Տուգանքները վճարած բարեխիղճ քաղաքացիները գումարների վերադարձ են պահանջում.Օսիպյան
«Տուգանքների համաներման մասին մեր որոշումից հետ եղել են նաև դժգոհություններ։
Բարեխիղճ քաղաքացիները, ովքեր վճարել են, ասում են՝ վերադարձրեք մեր գումարները, տարբեր կարծիքներ կան համացանցում, հիմա պետք է մենք փորձենք բացատրել եղելությունը ու մեր կայացրած այս որոշման հետևանքները», - Կառավարության այսօրվա նիստում ասաց ՀՀ ոստիկանապետ Վալերիյ Օսիպյանը:
«Պետք է տեսակետները քննարկել ու կայացնել հավասարակշռված որոշում։Ենթադրվում է, որ կան լուծումներ, այո՚, բարեխիղճ քաղաքացիները վճարել են, շատ-շատերը չեն վճարել, որովհետև մեծ հավանականությամբ չեն ունեցել, հիմա պարոն Միրզոյանն էլ է ասում վճարել է, ես էլ եմ վճարել, դո՞ւք էլ եք վճարել պարոն Օսիպյան, իսկ պարոն Զեյնալյանը նախկինում չի վճարել, բայց որոշել է քաղաքական իրավիճակի փոփոխություններից հետո վճարել», - արձագանքեց վարչապետ Փաշինյանը։
Նա նշեց, որ բոլոր կարծիքներն ու մտահոգությունները հաշվի առնելով պետք է կայացվի այս հարցով հավասարակշիռ որոշում։
Հետևեք մեզ Viber-ում
