Բաց նամակ. Իշխան Կարապետյանը օգտվել է տրված քարտ բլանշից և բացարձակ ամենաթողության վիճակից
Բաց նամակ ՀՀ վարչապետ Նիկոլ Փաշինյանին Սիրելի պարոն վարչապետ Ձեզ և մեզ շնորհավորում ենք նոր Հայաստանում: Անհամբեր սպասում ենք կառավարության ձևավորումից հետո պետական մյուս կառույցներում փոփոխություններին: Մամուլից տեղեկացանք և ողջունում ենք ՊԵԿ-ի նախագահի հեռացումը, որը շարունակեց նախկին կառավարությունների հարկային և մաքսային տեռորը և կեղեքումը, հովանավորչությունը և կաշառակերությունը` ուղղակի դրայվի մեջ: Սակայն Ձեզ ենք դիմում սննդի ոլորտի բիզնեսի անունից, ովքեր գործ են ունեցել սննդի անվտանգության տեսչության հետ, զգացել ու << վայելել>> նախկին կառավարության մեկ այլ շոու-բարեփոխում ոգով աշխատող ոչ պակաս կարևոր կառույցի <<քաղցրությունը>>: Սննդի անվտանգության տեսչության վերաբերյալ հասարակությունը և մամուլը քննարկելու առիթի, թեմայի պակաս չի ունեցել նախկին վարչապետ Կարեն Կարապետյանի կողմից իր ազգականին` Իշխան Կարապետյանին, պետ նշանակելուց ի վեր, շարունակվեց ծանոթ-բարեկամ-խնամի սկզբունքով ոլորտից բացարձակ անտեղյակ և այդ պաշտոնում աշխատանքային ու մասնագիտական փորձ չունեցող յուրայինին պաշտոն նվիրելու ավանդույթը: Վարչապետ Կարապետյանի կողմից սննդի անվտանգության վիճակը և դրա համար պատասխանատու կառույցին շանտղություն որակելուց հետո շանտղությունը ոչ միայն չվերացավ կամ չպակասեց, այլ նախկին դրայվի շղարշի տակ ստացավ աննախադեպ զարգացում, որի դրսևորումը արձանագրվեց տեսչության ստուգման վերաբերյալ վերահսկիչ պալատի հաշվետվությամբ: Իշխան Կարապետյանն օգտվելով տրված քարտ բլանշից և բացարձակ ամենաթողության վիճակից` հասցրեց հերոսանալ նախևառաջ տեսչության աշխատողներին անօրինական և աղմկահարույց աշխատանքից ազատումներով, ապա անմիջապես տեսչությունը ուղղակի հեղհեղեց անտեղյակ յուրային դրածոների բանակով, որը պետի դաբրոյով և նրան կրկնօրինակելով` բացահայտ անհարգալից վերաբերմունքով և սպառնալիքներով խոսում և գործում էր, սպառնում բիզնեսին, վիճակը ծայրահեղ վատ ներկայացնելով, սակայն իրականում թույլտվությունների և սերիֆիկատների տրամադրման, վտանգավոր սննդամթերքի կոծկման և անվտանգ ներկայացնելու, խախտումները չբացահայտելու և չտուգանելու համար սահմանելով և պահանջելով այնպիսի թվաբանություններ, որոնց մասին նախկին որևէ պետ նույնիսկ չէր երազի կամ համարձակվի, ինչն էլ հանգեցրեց տեսչության կողմից բիզնեսի գործունեության անօրինական կասեցման և արգելումների, պարտքերի և բանկերի վարկերի տակ կքման և ֆինանսական լուրջ դժվարությունների: Այս ամենի հետևանով շատերը փակեցին բիզնեսը և բազմաթիվ ընտանիքներ զրկվեցին օրվա ապրուստից: Իրականությունն այն է, որ սննդի տեսչության և նրա պետի ու մերձավոր պաշտոնյաների վերաբերյալ գոնե վերջին 1.5 տարվա մամուլի հրապարակումները քանակով և սրությամբ առնվազն թոփ եռյակի արժանի են, սակայն վարչապետի հովանավորյալ պետը մամուլով և տեսչության կայքով հանրությանն ուղղակի զզվեցնելու աստիճան հրամցնում է <<աննախադեպ, չտեսնված և չլսված գործունեության>> սեփական շոուն` թքած ունենալով հանրության, հասարակական կազմակերպությունների քննադատությունների և ի հրապարակումների վրա, միայն ՀԵՏՔ պարբերականի հրապարակումները դրա վառ ապացույցն են: Անդրադառնալով վերահսկիչ պալատին, խնդրում ենք Ձեր և պատկան մարմինների ուշադրությունը այդ հաշվետվության վրա, որը հրապարակվեց նախորդ կառավարության օրոք, և միանգամայն բնական էր վարչապետի հովանավորյալ ազգականի համար դրա զրոյական նշանակությունը: Հետաքրքիր է, թե ինչու վերահսկիչ պալատը գյուղնախարարության ստուգման արդյունքում ինչ-որ ծրագրով ներմուծված տավարի հատկացման գործով դիմեց դատախազությանը, իսկ մարդկանց կյանքին և առողջությանը ուղղակի առնչվող սննդի անվտանգության հսկող պետական կառույցի գործունեության ստուգմամբ արձանագրած խայտառակ և բազմապիսի խախտումների պարտեզից գոնե մի ծաղիկ կամ տերև հարկ չհամարեց կամ չցանկացավ նվիրել դատախազությանը: Վերահսկիչ պալատի հաշվետվության մեջ ներառված են ներմուծումների, պետական գնումների, ստուգումների, լաբորատորիայի, պետական միջոցների ծախսի, արդյունավետության, մի խոսքով` ամբողջ գործունեության վերաբերյալ խախտումներ, որոնք ամենևին էլ անմեղ և միամիտ կամ փորձ չունեին որակել հնարավոր չէ, որոնց հետևանքով ոչ թե կանխվել և բացահայտվել են սննդի ներմուծման և առևտրի ժամանակ մարդկանց կյանքին սպառնացող վտանգները, այլ տարբեր հնարամիտ և կռուտիտ տարբերակներով թույլատրվել են վտանգավոր սննդի ներմուծումները և վաճառքը: Իսկ զավեշտն այն է, կամ էլ ցինիկության վերջակետ, որ վերահսկիչ պալատի ստուգման հաշվետվության վերաբերյալ սննդի անվտանգության վերահսկող կառույցի կայքում տեղադրվել է մեկնաբանություն, որը կարդալիս շարքային քաղաքացու մոտ տպավորություն է ստեղծվում, որ վերահսկիչ պալատն առհասարակ իր տեղում չէ և ոչ կոմպետենտ է կամ դիտավորյալ զրպարտել է, որովհետև տեսչությունն ամբողջությամբ առարկել է: Մինչ օրս նման պաշտոնյաները սեփական դիմումով ազատվել են և հանգիստ ապրել կամ նշանակվել այլ պաշտոնի, իսկ այժմ դիմում ենք ոչ միայն աշխատանքից հեռացնելու, այլ պատասխանատվության կանչելու համար, որովհետև ինչպես Դուք եք ասում <<իրականությունն այլևս ուրիշ է և անվերադարձ, քայլ արա….>>:
Հետևեք մեզ Viber-ում
