Սերժ Սարգսյանի վարչապետության քվեարկության օրը ԱԺ-ում ռումբի մասին ահազանգ է եղել. ինչ է հայտնաբերել ԱԱԾ-ն

SHAMSHYAN.com-ի տեղեկություններով՝ երեկ ՝ մայիսի 6-ին, ՀՀ ազգային անվտանգության ծառայության, ոստիկանության Երևան քաղաքի վարչության աշխատակիցների կողմից ձեռնարկված օպերատիվ-հետախուզական գործողությունների և անցկացված բացատրական աշխատանքների արդյունքում ոստիկանության Արաբկիրի բաժին է ինքնակամ ներկայացել 34-ամյա Կարեն Գ.-ն։ Ինչպես հայտնում է ֆոտոլրագրող Գագիկ Շամշյանը, վերջինս հանդիսանում է Գերմանիայի Դաշնային Հանրապետւթյան քաղաքացի և կասկածվում է այս տարվա ապրիլի 17-ին ՀՀ ոստիկանության 1-02 ծառայություն զանգահարելու և տեղեկություն հայտնելու այն մասին, որ ՀՀ ազգային ժողովում ռումբ է դրված և այն պայթելու է։ Փաստի առթիվ ոստիկանության Արաբկիրի բաժնի հետաքննչական բաժանմունքում նյութեր են նախապատրաստվում։ Կարեն Գ.-ն, ով ահազանգել է ոստիկանություն և ներկայացել Սամվել անունով, ստորագրությամբ ազատ է արձակվել։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: