«Պարոն Ծառուկյան, այս փուլում որևէ կերպ մի՛ մտածեք վարչապետ առաջադրվելու հնարավորության մասին». Կարպիս Փաշոյան
Խորհուրդ պարոն Գագիկ Ծառուկյանին. Պարոն Ծառուկյան, այս փուլում որևէ կերպ մի՛ մտածեք վարչապետ առաջադրվելու հնարավորության մասին: Դա իսկապես անհեռանկար ձեռնարկ է: Վստահ եմ հիմա ակտիվորեն քննարկում եք այդ հարցը, գիտեմ նաև որ կողքից անընդհատ համոզում են, ինչպես նաև՝ հաճոյանալու և քծնելու համար իրավիճակի հետ չհամապատասխանող խորհուրդներ տալիս: Պարոն Ծառուկյան, այդ խորհուրդ տվողների պատճառով Դուք արդեն մեկ անգամ 2014 թ. կոպտագույն սխալ թույլ տվել եք: Եւ եթե հիշում եք բանից պարզվեց, որ ամենավճռական պահին բոլոր խորհրդատուները մեկ մարդու պես Ձեզ մենակ թողեցին ու լույսի արագությամբ անհետացան: Իսկ հիմա, եթե վարչապետ առաջադրվելու փորձ անեք, ապա թույլ կտաք երկրորդ կոպիտ սխալը, ինչը շատ ավելի կործանարար կլինի, քան՝ առաջինը: Թերևս միակ ճիշտ որոշումն այն կլինի, որ Դուք և Ձեր խմբակցությունը միասնական կերպով աջակցեք Նիկոլ Փաշինյանի թեկնածությունը: Մի՛ լսեք այդ վերլուծաբան կոչվածներին, հակառակ պարագայում ընդամենը մի քանի ժամվա ընթացքում կկորցնենք վստահության այն մանդատը, որը հանրության միջավայրում կուտակել եք տարիներով: Իսկ ողջամիտ որոշում կայացնելու դեպքում, հաստատապես Ձեր կուսակցությունը վճռական դեր է խաղալու նոր Հայաստանի կառուցման գործում: Սա Ձեր հեղափոխությունը չէր, այնպես մի արեք, որ պատմության մեջ մնաք որպես հեղափոխությանը հաղթանակից 15 րոպե առաջ միացած և ուրիշի քաղաքական կապիտալը յուրացնելու փորձ արած գործիչ:
Հետևեք մեզ Viber-ում
