Ղարաբաղյան «պայթյունը»՝ պահեստային տարբերակ

Ռուսաստանի Դաշնության արտաքին գործերի նախարարության մամլո խոսնակ Մարիա Զախարովան երեկ հայտարարել է, որ Լեռնային Ղարաբաղի հակամարտությունը պետք է կարգավորվի բացառապես խաղաղ եղանակով: «Բարդացումներ չպետք է թույլ տալ, քանի որ դա կհանգեցնի իրավիճակի վատթարացման: Ելքը պետք է գտնել միայն բանակցային ճանապարհով»,- ասել է Զախարովան: Նրա փոխանցմամբ, Ռուսաստանը առաջնորդվելու է Լեռնային Ղարաբաղի խնդրի կարգավորման շրջանակներում ստանձնած պարտավորություններով: «Կա Ռուսաստանի ազգը, կա Հայաստանի ազգը, և հենց այդ ժողովուրդների բարօրության և բարգավաճման առաքելությանն են ծառայում դիվանագետները: Բոլոր աստիճանների դիվանագետները պետք է մտածեն, թե ինչպես մեր երկրները, մեր ժողովուրդները պետք է զարգանան, կառուցեն համատեղ ապագան, հաշվի առնելով մեր պատմական բարեկամական կապերը, որոնք եղել են և կան»,- ասել է Զախարովան: Նա հավաստիացրել է, որ Ռուսաստանի Դաշնությունն ամեն ինչ արել և անում է այդ կապերը ամրացնելու և դեպի ապագա ուղղելու համար: «Մենք կատարել ենք մեր պարտավորությունները, որոնք առնչվում են Հայաստանի և Ադրբեջանի համար իսկական վերք հանդիսացող տարածաշրջանային խնդրին, մենք ելնելու ենք մեր ստանձնած պարտավորություններից»,- ասել է Զախարովան: Հայաստանյան իրադարձությունների առնչությամբ Ռուսաստանի ակտիվությունը վերջին օրերին միանգամայն հասկանալի էր: Նրանք փորձում են իրենց սցենարը՝ Կարեն Կարապետյանի վարչապետությամբ, ի կատար ածել՝ ազդելով ներքաղաքական պրոցեսների վրա՝ քարոզչական լծակներով: Բայց ուշագրավ է, որ նրանք պահում են պահեստային տարբերակը՝ Լեռնային Ղարաբաղի շուրջ իրավիճակի լարման սպառնալիքը: Դա եղել է առաջին իսկ օրվանից, երբ սկսեցին շփման գծից ադրբեջանական զինտեխնիկայի կուտակումների մասին տեղեկություններ հրապարակվել: Այսպես` Մոսկվան պահում է իր «պահեստային տարբերակը»: Այն պահից, երբ Հայաստանում իրադարձություններն ընթանան Մոսկվայի համար ոչ ցանկալի ուղով՝ Մոսկվան գործի կդնի Ղարաբաղում շփման գծում լարվածության մեծացման սցենարը: Դա է պատճառը, որ պաշտոնական Մոսկվայից հնչող հայտարարություններում արդեն իսկ նկատվում է ղարաբաղյան թույլ ահազանգը: Մետաքսյա Շալունց