«Ժամանակն է, որ ընդդիմությունը գնա զիջման»․ Գառնիկ Իսագուլյան

«Ազգային անվտանգություն» կուսակցության նախագահ Գառնիկ Իսագուլյանն ակնկալում է, որ Նիկոլ Փաշինյանը Սերժ Սարգսյանի հեռանալուց հետո ոչ սահմանադրական եւ մաքսիմալիստական բաներ չի պահանջի, «դա կլինի անիմաստ»։ «Ժամանակն է, որ ընդդիմությունը գնա զիջման։ Ուզենք, չուզենք, ՀՀԿ-ն խորհրդարանում մեծամասնություն է»,-ասում է պարոն Իսագուլյանը: Քաղաքագետի պատկերացմամբ, վարչապետ կարող է դառնալ Կարեն Կարապետյանը, իսկ առաջին փոխվարչապետի աթոռը զբաղեցնի ընդդիմությունը, որը կարող է ստանալ նաև վերահսկողական լծակներ։ Նա նաև նշում է, որ այս ընթացքում խորհրդարանը կարող է փոխել Ընտրական օրենսգիրքը՝ հրաժարվելով ռեյտինգային ընտրակարգից, «որից հետո 6 ամսից կամ մեկ տարուց, եթե ընդդիմությունը վստահ է, որ գործող խորհրդարանը չի արտացոլում իրական քաղաքական ուժերի հարաբերակցությունը, նշանակվեն ԱԺ ընտրություններ»։ Ըստ պարոն Իսագուլյանի, եթե ընդդիմությունը գնա մինչև վերջ և բոլոր հանրապետականներին փորձի հեռացնել իշխանությունից, այդ հանրապետականները կդառնան ՔՊ-ականներ, ինչպես 98-ին ՀՀՇ-ականները դարձան Երկրապահ։ factor.am