Ընդունել շարժման առաջարկները, երաշխավորել խաղաղ հանգուցալուծում. ՕԵԿ-ը դիմել է ՀՀԿ-ին

ՕԵԿ-ն կոչ  է անում ընդունել շարժման առաջարկները, երաշխավորել խաղաղ հանգուցալուծում, իսկ կուսակիցներին շարունակել ակտիվ մասնակցությունը համաժողովրդական ընդվզմանը: Այս մասին ասված է ՕԵԿ-ի հայտարարության մեջ: «Օրինաց երկիր կուսակցությունը, որ արդեն մեկ շաբաթ է իր ակտիվ մասնակցությունն է ցուցաբերում համաժողովրդական ընդվզմանը եւ ամենօրյա ռեժիմով հնչեցված քաղաքական հայտարարություններով իր զորակցությունն ու քաղաքական աջակցությունն է ցուցաբերել  քաղաքացիական խաղաղ անհնազանդությանը, որպես հանգուցալուծում առաջարկելով արտահերթ խորհրդարանական ընտրությունների անցկացումը, կոչ է անում այսօրվա իշխանություններին` հաշվի առնելով երկրում ստեղծված նոր քաղաքական իրողությունները, ցուցաբերել խոհեմություն եւ ընդառաջ գնալ համաժողովրդական շարժման առաջարկներին եւ շուտափույթ հանգուցալուծում տալ ստեղծված իրավիճակին՝ հանուն Հայաստանի Հանրապետության եւ նրա ժողովրդի անվտանգության: Իրավապահներից պահանջում ենք  զերծ մնալ ցուցարարների եւ շարժման մասնակիցների նկատմամբ ուժի հնարավոր  կիրաժման որեւէ դրսեւորումից: Միեւնույն ժամանակ կոչ ենք անում բոլոր քաղաքացիներին իրենք ակտիվ եւ խաղաղ  մասնակցությունն ունենալ համաժաղովրդական շարժմանը` այն հասցնելով իր տրամաբանական ավարտին», - ասված է հայտարարության տեքստում: