Ռուսաստանի եւ Արեւմուտքի սոլիդարությունը Հայաստանի հարցում
Հայկական ժամանակը գրում է.«Գունավոր հեղափոխություն» եզրույթի հեղինակ Մայքլ Մաքֆոլը ապրիլի 23-ին գրառում կատարեց Թվիթերի իր միկրոբլոգում. «Որքա՞ն ժամանակ կպահանջվի Պուտինից՝ Հայաստանի իրադարձություններում ԱՄՆ-ին մեղադրելու համար»,- ասված էր գրառման մեջ: Սակայն Պուտինն ավելի խելացի գտնվեց: Ճիշտ է, նա անձամբ դեռեւս կարծիք չի հայտնել, սակայն իր խոսնակ Դմիտրի Պեսկովի միջոցով մի քանի կարեւոր ազդակ է ուղարկել ինչպես ԱՄՆ, այնպես էլ Հայաստան: «Մենք շատ ուշադիր հետեւում ենք Հայաստանում կատարվող իրադարձություններին: Հայաստանը մեր ամենամոտ դաշնակիցն է, որի հետ մենք զարգացնում ենք ամենասերտ հարաբերությունները»,- դեռեւս Սերժ Սարգսյանի հրաժարականից առաջ ասել էր Պեսկովը: Նա նաեւ հայտարարել էր, որ հայաստանյան իրադարձությունները Հայաստանի Հանրապետության ներքին գործն են, ապա զարմացել, թե «ինչո՞ւ Մոսկվան պետք է խառնվի»: Այլ կերպ ասած, Մոսկվային իրական պատկերը հայտնի է՝ այս գործընթացը Հայաստանն իրենից պոկելու նպատակ չի հետապնդում: Այդ դեպքում կարեւոր չէ, թե ով կլինի «ամենամոտ դաշնակցի» ղեկին՝ իրենք շարունակելու են «զարգացնել ամենասերտ հարաբերությունները»: Սարգսյանի հրաժարականից հետո Պեսկովը հանդես եկավ հայտարարությամբ, որում հույս հայտնեց, որ «արդեն տեսանելի ապագայում ի հայտ կգան այն քաղաքական կոնֆիգուրացիայի ուրվագծերը, որը կդառնա հայ ժողովուրդը ներկայացնող ուժերի կոնսենսուսը»: Պաշտոնապես արձագանքել են նաեւ ԱՄՆ-ն եւ Եվրոպան: Հայաստանում ԵՄ պատվիրակության ղեկավար, դեսպան Պյոտր Սվիտալսկին, պատասխանելով լրագրողների հարցին՝ թե ինչ ազդեցություն կունենան վերջին իրադարձությունները Հայաստանի եւ ԵՄ-ի միջեւ կնքված համաձայնագրի իրականացման գործընթացի վրա պատասխանել է. «Այս իրադարձությունները ցույց տվեցին, որ հենց այն արժեքները, որոնք կարեւոր են հայերի համար, կազմում են Հայաստան-ԵՄ համաձայնագրի հենքը: Մենք կաշխատենք Հայաստանի հետ այս համաձայնագրի իրականացման ուղղությամբ ավելի ջանասիրաբար եւ եռանդով, քան նախկինում»: Հայտարարություն է տարածել նաեւ ԱՄՆ պետդեպարտամենտը, որում նոր կառավարության հետ սերտ համագործակցության հույս է հայտնել: «Մենք շնորհակալություն ենք հայտնում վարչապետ Սարգսյանին իր երկար տարիների ծառայության եւ հայ-ամերիկյան գործակցությունն ամրապնդելու իր գործունեության համար: Հուսով ենք, որ նրա հաջորդին որոշելու ժողովրդական գործընթացը կիրականացվի թափանցիկ եղանակով՝ համաձայն Հայաստանի օրենքների ու ստանձնած միջազգային պարտավորությունների: Սպասում ենք նոր կառավարության հետ սերտ համագործակցությանը»,- ասված է հայտարարության մեջ: Պաշտոնական մակարդակով դրական արձագանքը տարածաշրջանում հետաքրքրություն ունեցող բոլոր մեծ կենտրոններից թույլ է տալիս փորձագետներին գալ եզրակացության, որ Հայաստանում տեղի ունեցող իրադարձությունները չէր կառավարում կենտրոններից ոչ մեկը: Նման եզրակացության են եկել ինչպես ռուս, այնպես էլ արեւմտյան մի շարք փորձագետներ: «Ազատություն» ռադիոկայանի ռուսական ծառայության եթերում Քարնեգի հիմնադրամի փորձագետ Անդրեյ Կոլեսնիկովը շատ բարձր գնահատականի է արժանացրել Հայաստանի քաղաքացիական հասարակության հասունությունը եւ քաղաքական մշակույթը: «Դա ազգային եւ քաղաքական մշակույթի այն մակարդակն է, որը թույլ է տալիս փոխել իշխանությունը: Դա ապշելու բան է, իրապես հաճելի»,- ասել է Կոլեսնիկովը, ապա հավելել,- «Այդ պատճառով Հայաստանը գրպանային պետություն չէ»: «Настоящее время»-ին տված հարցազրույցում քաղաքագետ Արկադի Դուբնովը վստահություն է հայտնել, որ իշխանափոխությունը չի բերի Հայաստանի արտաքին վեկտորի փոփոխման: Նա նաեւ անդրադարձել է հեղափոխության «գունավոր» լինելուն: «Սա «գունավոր հեղափոխություն» չէ: Այստեղ չկան Սորոսը, Պետդեպը, անգամ «Մոսկվայի ձեռքը»: Այդ պատճառով սա բառացիորեն «թավշյա հեղափոխություն» է՝ խաղաղ, ժողովրդական»,- ասել է Դուբնովը: Խոսելով Նիկոլ Փաշինյանի՝ վարչապետ դառնալու հնարավորության մասին, Դուբնովը նշել է, որ շատ հնարավոր է, որ ընդդիմության առաջնորդը չլինի վարչապետ: «Բողոքի եւ հեղափոխության առաջնորդները միշտ չէ, որ արդյունավետ մենեջեր են լինում: Իմ կարծիքով Փաշինյանն արդեն մտել է Հայաստանի եւ հետխորհրդային ողջ տարածքի պատմության մեջ, որպես «թավշյա հեղափոխության» ոգեշնչող»,- ասել է քաղաքագետը: Մանրամասն՝ «Հայկական ժամանակ» օրաթերթի այսօրվա համարում:
Հետևեք մեզ Viber-ում
