Մելիք Ադամյան փողոցում ոստիկաններ եւ զինտեխնիկա են կուտակել

Խիստ հսկողության տակ է վերցված ՀՀԿ կենտրոնական գրասենյակը: Մելիք Ադամյան փողոցում ոստիկաններ եւ զինտեխնիկա են կուտակել: Րոպեներ առաջ կրկին փշալարերով մեքենաներ եւ այլ զինտեխնիկա տեղափոխվեց այնտեղ: Ոստիկաններին հրաման տրվեց շրջափակել Կառավարության շենքը: Խորհուրդ եմ տալիս ժամանակի վրա չաշխատել,ՀՀԿ -ն դա է անում,երթի ընթացքում հայտարարեց Նիկոլ Փաշինյանը եւ անդրադառնալով իր այն հայտարարությանը, որ ՀՀԿ-ականները Սերժ Սարգսյանի հրաժարականը փորձում են, որպես ծխածածկույթ օգտագործել, մեկնաբանեց. «Ուզում են Կարեն Կարապետյանին նշանակեն վարչապետ եւ մտածում են, որ ժողովուրդն այդքան միամիտ է, որ կհամաձայնի՝ մեկ ՀՀԿ-ականին, մեկ ուրիշ ՀՀԿ-ականով փոխարինելուն»,- ասաց Նիկոլ Փաշինյանը: «Կարեն Կարապետյանը չի հասկացել, թե մենք ինչ ենք ասում: Մենք ասում ենք, որ վարչապետ պետք է ընտրվի ԱԺ-ում, թեկնածությունը պետք է առաջադրվի խմբակցությունների կողմից, իսկ ժողովուրդը հրապարակում մինչեւ այդ պետք է հավանություն տա որեւէ թեկնածուի»,- մեկնաբանելով  Կարեն Կարապետյանի այն խոսքերը, որ հրապարակում վարչապետ ընտրելը հակասում է օրենքին,հայտարարեց Փաշինյանը: Դիտարկմանը՝ ՀՀԿ-ն չի քվեարկի այդ թեկնածուին, Փաշինյանը հարցադրում արեց. «Նրանք ուզու՞մ են, որ այս իրավիճակը լուծում ստանա: Իրենք պետք է հասկանան, որ ՀՀԿ-ն այլեւս իշխանություն չէ»: Փաշինյանը նաեւ ասաց, որ իրենք կբոյկոտեն այն արտահերթ ընտրությունները, որոնք կանցկացվեն այս իշխանության ներքո: