Ալիևը սպառնում է՝ «օկուպացված տարածքներում կծածանվի ադրբեջանական դրոշը», իսկ դիտորդները մեղադրվում են «հայերի շահերը սպասարկելու» մեջ

Ադրբեջանում ազատ ընտրությունների անցկացումն անհնարին է «Ադրբեջանում տիրող քաղաքական միջավայրում ազատ և արդար ընտրությունների անցկացումն անհնարին է», նախօրեին Բաքվում կայացած մամուլի ասուլիսում նման հայտարարությամբ են հանդես եկել ապրիլի 11-ի նախագահական ընտրությունների ընթացքին հետևած միջազգային դիտորդները: «Ադրբեջանում արտահերթ նախագահական ընտրությունները կայացել են սահմանափակումներով աչքի ընկնող քաղաքական միջավայրում և այնպիսի օրենքների առկայության պայմաններում, որոնք կրճատում են մարդու հիմնարար ազատություններն ու իրավունքները»,- ըստ «Ազատության»՝ նշված է ԵԱՀԿ դիտորդների տարածած հայտարարության մեջ: «Ընտրարշավն աչքի ընկավ բազմակարծության բացակայությամբ: Դա վերաբերում էր նաև ադրբեջանական լրատվամիջոցներին: Ընտրությունների առանձնահատկություններից էր իրական ազատության բացակայությունը»,- նաև նշում են արևմտյան դիտորդները` արձանագրելով, որ թե՛ քվեարկության ընթացքը, և թե՛ քվեների հաշվարկն աչքի ընկան լուրջ խախտումներով: Այս մասին, մասնավորաբար, հայտարարել է դիտորդական առաքելության ղեկավարներից մեկը` ԵԱՀԿ Խորհրդարանական վեհաժողովի անդամ Նիլզա Դե Սենան: «Քվեարկության օրը մենք արձանագրել ենք օրենքով սահմանված պարտադիր ընթացակարգերի համատարած անտեսում, թափանցիկության բացակայություն, նաև մի շարք լուրջ ընտրախախտումներ, այդ թվում՝ քվեատուփերի լցոնման դեպքեր»,- նշել է Դե Սենան: «Քվեների հաշվարկը բացասական է գնահատվել դիտարկված ընտրատեղամասերի ավելի քան 50 տոկոսում` հիմնականում կանխամտածված կեղծիքների և օրենքով սահմանված ընթացակարգերի անտեսման պատճառով»,- հավելում են դիտորդները: Մամուլի ասուլիսին ներկա իշխանամետ լրագրողներին դիտորդների հրապարակած գնահատականներն ակնհայտորեն դուր չեն եկել: Նրանք նախ ընդհատել են դիտորդների ասուլիսը` նրանց մեղադրելով հայերի շահերը սպասարկելու, զեկույցում իրականությանը չհամապատասխանող տեղեկություններ տարածելու մեջ, ապա պահանջել փոփոխության ենթարկել ողջ փաստաթուղթը: ԵԱՀԿ դիտորդները ստիպված են եղել 20 րոպեով ընդհատել զեկույցի հրապարկումը: Այն սրահ, որտեղ ընթանում էր մամուլի ասուլիսը, նրանք վերադարձել են միայն կարգուկանոնի պահպանման հստակ երաշխիքներ ստանալուց հետո: Ադրբեջանի Կենտրոնական ընտրական հանձնաժողովը, սակայն, պնդում է, որ ապրիլի 11-ի քվեարկությունը համապատասխանել է բոլոր միջազգային նորմերին: Նախագահական ընտրությունների առաջին արդյունքներն այս կառույցը հրապարակեց երեկ ուշ երեկոյան` տեղամասերի փակվելուց մի քանի ժամ անց: Դրանց համաձայն` Իլհամ Ալիևի օգտին քվեարկել է ընտրություններին մասնակցած Ադրբեջանի քաղաքացիների 86 տոկոսը: Առաջադրված թեկնածուներն աննշան թվով քվեներ են ստացել, առավելագույնը՝ 3,5 տոկոս: Ըստ Ալիևի՝ «ադրբեջանական բանակը ազատագրել է հողերի մի մասը» ԿԸՀ նախագահ Մազահիր Փանահովի հայտարարությունից հաշված րոպեներ անց ադրբեջանական հեռուստաալիքները հեռարձակեցին Իլհամ Ալիևի հետևյալ ուղերձը: «Այսօր Ադրբեջանի ժողովուրդը քվեարկեց կայունության, անվտանգության և զարգացման օգտին»: Ալիևը կրկին պնդել է, թե իր պաշտոնավարման ընթացքում Ադրբեջանը լուրջ հաջողություններ է արձանագրել նաև Հայաստանի հետ հակամարտության ընթացքում: «Մենք լուրջ դիվանագիտական հաղթանակներ ենք արձանագրել: Միաժամանակ, մենք մեծ հաղթանակի ենք հասել ռազմի դաշտում: Ադրբեջանցի զինվորը, ադրբեջանական բանակը ազատագրեցին մեր հողերի մի մասը: Կգա մի օր, երբ այսօր դեռևս օկուպացիայի տակ գտնվող տարածքներում ևս կծածանվի ադրբեջանական դրոշը և այնտեղ էլ նախագահական ընտրություններ կանցկացվեն», նշել է Ալիևը: Այն նույն ժամերին, երբ ադրբեջանական հեռուստաընկերությունները հեռարձակում էին երկրի ղեկավարի ուղերձը, իշխող «Ենի Ազերբայջան» կուսակցությունը փողոց է դուրս բերել իր անդամներին` տոնելով Իլհամ Ալիևի չորրորդ վերընտրությունը: «Ենի Ազերբայջանի» անդամները կուսակցական դրոշներ կրող մեքենաներով մի քանի ժամ շարունակ երթևեկում էին քաղաքի կենտրոնական փողոցներով, կուսակցության գրասենյակի մոտ էլ տոնական համերգ էր կազմակերպվել: Ադրբեջանական ընդդիմությունը, սակայն, չի ընդունում ընտրությունների արդյունքների լեգիտիմությունը: Ընդդիմադիր մի շարք կուսակցությունների միավորող «Ժողովրդավարական ուժերի ազգային խորհուրդը» երեքշաբթի ուշ երեկոյան հանդես եկավ հայտարարությամբ, նշելով, որ ապրիլի 11-ի ընտրությունները չեն համապատասխանել ո՛չ Ադրբեջանի ստանձնած միջազգային պարտավորություններին, ո՛չ էլ երկրի սահմանադրության դրույթներին: Նման հայտարարությամբ է հանդես եկել նաև «Մուսավաթ» կուսակցությունը` նշելով, որ արտահերթ նախագահական ընտրությունների անցկացումն ի սկզբանե հակասահմանադրական է եղել: Արդեն երկու օրից՝ ապրիլի 14-ին ադրբեջանական ընդդիմությունը հանրահավաք կանցկացնի` բողոքելով նախագահական ընտրությունների կեղծման դեմ: Ադրբեջանի ընդդիմադիր Ժողովրդավարական ուժերի ազգային խորհուրդը ապրիլի 11-ին կայացած նախագահական ընտրությունների արդյունքների դեմ ուղղված հանրահավաք է իրականացնելու: Ազգային խորհուրդը ակցիայի անցկացման թույլտվություն ստանալու համար դիմել է Բաքվի քաղաքապետարան, դիմումը բավարարվել է: Հանրահավաքը տեղի է ունենալու ապրիլի 14-ին Բաքվի Յասամալի շրջանում: Թամար Բագրատունի