«Իմ քայլը» արշավի մասնակիցները շարժվում են Ազատության հրապարակ (տեսանյութ)

«ԻմՔայլը» նախաձեռնության անդամները ԱԺ «Ելք» խմբակցության ղեկավար Նիկոլ Փաշինյանի հետ րոպեներ առաջ մտան Երևան: «Մենք անցանք 200 կմ՝ 306 000 քայլով: Կեցցենք մենք, ժողովուրդը»,- հայտարարում էր   Փաշինյանը: Երևան մտնելուն պես քայլարշավի մասնակիցները գոչեցին՝ «Քայլ արա, մերժիր Սերժին, քայլ արա, մերժիր Սերժին»: «Կապ չունի՝ քանի մարդ կլինի Ազատության հրապարակում, մենք գործողություններ ենք ձեռնարկելու: Կլինենք 5 հոգով, կանեն էնպիսի գործողություն, որ ի վիճակի է անել 5-ը, 100 հոգի՝ կանենք այդքանով, 10. 000 հոգի կլինի, կանենք իշխանափոխություն»,- Երևանում՝ լրագրողների հետ զրույցում, ասաց  ՔՊ անդամ Նիկոլ Փաշինյանը: Նա տեղեկացրել է, որ ծավալուն ելույթ է ունենալու Ազատության հրապարակում: «Շուրջօրյա լինելու ենք հրապարակում, թե հիմա նստած կլինենք, թե կանգնած, էդ տեխնիկական հարց է: Գիշերելու ենք հրապարակում, մինչև ինչ-որ հանգուցալուծում»,- ասել է նա: «Ես իմ ելույթում կանդրադառնամ, թե ինչի ա բերել Հայաստանին պետական շահը: Սերժ Սարգսյանի պետական շահը փեսայի դոշից մեդալներ կախե՞լն ա, թե՞ սեփական եղբորը Հայաստանի հանքարդյունաբերության ստվերային կառավարիչ նշանակելը, թե՞ էն մյուս եղբորը Մատենադարան նվիրելը: Թե՞ Հայաստանի թիվ 1 առանձնատունը սեփական ընտանիքի սեփականությունը դարձնելը: Թե՞ 80-ականների զենքով կռվելը: Թե՞ 800 հեկտար տարածք զիջելը»,-թվարկում է  Փաշինյանը: Դիտարկմանը, թե Տարոն Մարգարյանը չի տվել Ազատության հրապարակում գիշերելու թույլտվություն, Փաշինյանը պատասխանել է. «Եթե Տարոն Մարգարյանենց հայաթում պատրաստվեինք գիշերելու, թույլտվություն կվերցնեինք, բայց պատրաստվում ենք մեր մայրաքաղաքի հանրային վայրում գիշերել, որևէ մեկի թույլտվությունը չունենք: Հավաքների ազատության մասին օրենքն ամեն ինչ կարգավորել է... Կուզենանք վրան դնել, կդնենք, չէ, չենք դնի»: #ԻմՔայլը արշավի մասնակիցները շարժվում եմ դեպի Ազատության հրապարակ: