Կարևոր է Ռուսաստանի դերը ԼՂ հակամարտության կարգավորման գործում․ Արմեն Սարգսյան
«Չափազանց կարևոր է Ռուսաստանի դերը Լեռնային Ղարաբաղի հակամարտության կարգավորման գործընթացում: Ավելի քան 25 տարի հակամարտության կարգավորման շուրջ բանակցություններն անց են կացվում ԵԱՀԿ Մինսկի խմբի ձևաչափով՝ համանախագահ երկրներ Ռուսաստանի, ԱՄՆ-ի և Ֆրանսիայի առաջարկած կարգավորման սկզբունքների և տարրերի հիման վրա: Ռուսաստանն առանցքային դեր է խաղում ղարաբաղյան հակամարտության կարգավորման գործընթացում՝ որպես Մինսկի խմբի համանախագահներից մեկը:23 տարի առաջ Ղարաբաղում եռակողմ հաշտեցումը ձեռք է բերվել հենց Ռուսաստանի միջնորդության շնորհիվ»,-այս մասին ՏԱՍՍ-ի հետ զրույցում հայտարարել է նախօրեին Հայաստանի նախագահի պաշտոնը ստանձնած Արմեն Սարգսյանը։ «Հայաստանը բարձր է գնահատում այդ միջնորդական ջանքերը խնդրի խաղաղ կարգավորման լուծման որոնումներում: Ակնհայտ է, որ խնդրի կարգավորման համար անհրաժեշտ է խաղաղության և համաձայնության գալու քաղաքական կամք: Իր կողմից Հայաստանն անում է հնարավոր ամեն բան խաղաղության ձեռքբերման համար և ակնկալում է, որ ադրբեջանական կողմը նույնպես նույնկերպ կվարվի:Վերջ ի վերջո, բոլոր տարածաշրջանային հակամարտությունները լուծվում են, և «դրանք հաղթահարելի են»»,- ասել է նա: Նա ընդգծել է, որ պատմությունը տեսել է հակամարտություններ՝ ոչ պակաս դաժան և ողբերգական:
Հետևեք մեզ Viber-ում
