Սերժ Սարգսյանի ու Իլհամ Ալիևի թիվ մեկ պրոբլեմը

Ադրբեջանում ապրիլի 11-ին կկայանան արտահերթ նախագահական ընտրություններ: Ապրիլյան պատերազմից 2 տարի անց, Հայաստանում կառավարման համակարգի փոփոխությունից հետո նաև Ադրբեջանը գնում է նախագահական արտահերթ նախագահական արտահերթ ընտրությունների: Ապրիլյան պատերազմից հետո երկու տարիների ընթացքում շատ բան է փոխվել աշխարհում և տարածաշրջանում: Սրվել են Ռուսաստան-Արևմուտք հարաբերությունները, Հայաստանը ԵՄ-ի հետ համաձայնագիր է ստորագրել: ԵԱՀԿ Մինսկի խումբը համանախագահող պետությունները մի քանի անգամ կոշտ հայտարարություններ են հանդես եկել՝ նկատի ունենալով Ադրբեջանի սադրիչ պահվածքը, թեև խուսափել են հասցեական հայտարարություններից: Միջնորդներն, իրավիճակը Լեռնային Ղարաբաղի խնդրի շուրջ, կարելի է ասել, առայժմ կարողանում են պահել վերահսկելի պայմաններում՝ ձգտելով ամեն գնով ապահովել բանակցային գործընթացի շարունակականությունը: Սակայն, Ալիևը կրկին դառնալով Ադրբեջանի նախագահ՝ փորձելու է իր անկրկնելիության և անփոխարինելիության համոզմունքը տարածել, իսկ դա կարող է տարածվել ԼՂ խնդրի վրա, սահմանային իրավիճակը կրկին սրելու միջոցով: Հայաստանում էլ Սերժ Սարգսյանի անփոխարինելիության համոզումն են տարածում՝ որպես հիմնավորում բերելով Հայաստանի ու Արցախի անվտանգության ապահովման անհրաժեշտության հարցում նրա ունեցած փորձը: Սերժ Սարգսյանի և Իլհամ Ալիևի անփոխարինելիությունն ինչպե՞ս է ազդելու ղարաբաղյան հիմնախնդրի կարգավորման գործընթացի վրա, էլ ավելի՞ է կոշտացնելու նրանց դիրքորոշումը, թե՞ հնարավորություններ կան բանակցություններում առաջընթացի հասնելու ուղղությամբ: Ադրբեջանի դեպքում ամեն ինչ պարզ է: Ալիևը երբեք չի փայլել կառուցողականությամբ, հազիվ է թե նրա նախագահության հերթական փուլը նշանավորվի արդյունավետ բանակցություններով: Սերժ Սարգսյանն էլ Ալիևի ապակառուցողականությունը հիմք ընդունելով՝ որևէ դրական տեղաշարժ բացառում է բանակցություններում: Ապրիլյան պատերազմը շատ բան փոխեց Հայաստանում՝ համակարգից դժգոհության, բանակում իրավիճակի վերաբերյալ: Երկու տարի խոսվել է «դասեր քաղելու» անհրաժեշտության մասին, որոշակի քայլեր, իհարկե, առաջնագծում արվել են: Բայց՝ ընդամենն այդքանը: Ի՞նչ է արվել Հայաստանի՝ որպես պետության, ամրությունն ապահովելու համար, սոցիալ-տնտեսականից սկսած մինչև դիվանագիտական ճակատ: Սահմանագիծն ու ճակատը պահող զինվորն իր անելիքը լավ գիտե: Իսկ իշխանավորնե՞րը... Թամար Բագրատունի