Արփինե Հովհաննիսյանն ու Գևորգ Պետրոսյանն ընդդեմ վարչապետի

Այսօր ԱԺ Պետաիրավական և մարդու իրավունքների հարցերի մշտական հանձնաժողովի նիստում  ՀՀ աշխատանքի և սոցիալական հարցերի նախարարի տեղակալ Թադևոս Ավետիսյանը, ներկայացնելով «ՀՀ տոների և հիշատակի օրերի մասին» ՀՀ օրենքում փոփոխություն կատարելու մասին նախագիծը, նշեց, որ հունվարի 3-ը, 4-ը և 5-ը կառավարությունն առաջարկում է հանել նախածննդյան տոների շարքից համաձայն վարչապետ Կարեն Կարապետյանի կողմից նախաձեռնած օրինագծի: Թ. Ավետիսյանի խոսքով` Հայաստանում, համաձայն ՀՀ աշխատանքային օրենսգրքի 158-159-րդ հոդվածների, ամենամյա նվազագույն արձակուրդի տևողությունը հնգօրյա աշխատանքային շաբաթվա դեպքում 20 աշխատանքային օր է, և այդ ընթացքում պահպանվում է աշխատատեղը և վճարվում է միջին աշխատավարձը, սրան գումարենք 16 ոչ աշխատանքային օր` ազգային տոներ և հիշատակի օրեր, ստացվում է՝ 36 վճարվող հանգստյան օր: «Նախածննդյան տոները ոչ աշխատանքային հանդիսանալը նպատակահարմար չէ նաև սոցիալ-տնտեսական տեսանկյունից»,- ասաց փոխնախարարը: Սակայն «Ծառուկյան» խմբակցության պատգամավոր Գևորգ Պետրոսյանը օրինագիծը դպրոցական շարադրություն անվանեց. «Ես չեմ հասկանում, թե ինչու ենք մենք որպես հիմնավորում ներկայացնում, որ այս նախագծի ընդունումը միտված է երկրի սոցիալ-տնտեսական և ֆինանսական համակարգերի նորմալ կենսագործունեության ապահովմանը: Ի՞նչ կապ ունեն այդ երեք արձակուրդային օրերը սոցիալ-տնտեսական և ֆինանսական համակարգերի կենսագործունեության ապահովման հետ: Ես կարծում եմ, որ որևէ կապ չունեն»: Հանձնաժողովի անդամ Արփինե Հովհաննիսյանը նկատեց, որ ՀՀ կառավարությունն իր առջև նպատակ չի դրել հանգուցյալներին անհանգստացնել, բայց համաձայնեց, որ հիմնավորումները հիշեցնում են շարադրություն: