Թուրքիայում մեկնարկել է «Կայծակ-2018» զորահավաքային վարժանքների հերթական փուլը
Ապրիլի 2-ին Թուրքիայում մեկնարկում է երկրի զինված ուժերի Yıldırım-2018 («Կայծակ-2018») զորահավաքային վարժանքների հերթական փուլը: Վարժանքները շարունակվելու են մինչեւ մայիսի 10-ը: Այս մասին հայտնում է Թուրքիայի ԶՈւ գլխավոր շտաբի կայքը, գրում է Ռազմինֆոն: Զորավարժության հայտարարված նպատակը զորահավաքային համակարգը, զորավարժությանը մասնակցող պահեստազորի անձնակազմի մարտական պատրաստությունը, մարտական գործողությունների ժամանակ զենք-զինամթերք կիրառելու հմտությունները, զորահավաքի եւ պատերազմական իրադրության ժամանակ ԶՈւ ստորաբաժանումների եւ տարբեր նախարարությունների, հասարակական կառույցների գործողությունների համակարգումը ստուգելն է: «Կայծակ-2018» զորավարժության գարնանային փուլն անցկացվելու է Անթալիա, Մուղլա, Ադանա, Իզմիր, Մանիսա, Աֆյոնգարահիսար, Բալըքէսիր, Թեքիրդաղ, Բուրսա, Դենիզլի, Քոնիա, Էսքիշեհիր, Կայսերի, Ամասիա, Անկարա, Մալաթիա, Դիարբեքիր, Բաթման, Մուշ եւ Էրզրում նահանգներում եւ քաղաքներում տեղակայված ռազմաօդային ուժերի ռազմաբազաներում եւ կենտրոնական հրամանատարություններում: Yıldırım պահեստազորի զորավարժությունը պլանային բնույթ է կրում եւ անցկացվում է ամեն տարի երկու անգամ՝ աշնանային եւ գարնանային փուլերով: Նախորդ փուլն անցկացվել էր 2017 թ. հոկտեմբերին:
Հետևեք մեզ Viber-ում
