Սերժ Սարգսյանի վարչապետության պայքարին ինչ որ պահից ստվերային ուժեր կաջակցեն
Հարցազրույց քաղաքագետ Երվանդ Բոզոյանի հետ: -Սերժ Սարգսյանի վարչապետ դառնալու գործընթացը խափանելու նպատակով ընդդիմադիր դաշտում կոնսուլտացիաներ են ընթանում: Ձեր կարծիքով ինչով կավարտվի այդ գործընթացը, կհաջողվի արդյոք ընդդիմադիրներին համատեղվել եւ միասնաբար պայքարել, եթե անգամ խորհրդարանական Ելք դաշինքում դրա շուրջ համաձայնության չեկան եւ Նիկոլ Փաշինյանը իր թիմով է դուրս գալու պայքարի: -Թե ինչով կավարտվի այդ գործընթացը, կդժվարանամ պատասխանել: Այս պահին լուրջ հեռանկար չի երեւում, բայց դա չի նշանակում, որ եթե պրոցեսը սկսվի , դրանից մեծ գործընթաց չի առաջանա: Այսինքն ցանկացած նման երեւույթ անկանխատեսելի տարր է պարունակում, դրա համար էլ նյարդայնացնում է իշխանություններին: Ինչ վերաբերում է Ելք-ի պահվածքին, ապա բնականաբար , այո, հիմնականում դեմ են, որ մտնեն այդ գործընթացի մեջ մի շարք օբյեկտիվ պատճառներով: Նախ նրանք չեն հավատում, որ հաջողության կհասնեն, երկրորդ՝ ըստ էության նրանք չեն ուզում լարված եւ նյարդային դաշտ ստեղծել իշխանության հետ, մանավանդ որ Ազգային ժողովում նրանք ստատուս քվոն բալանսի բերել են: Ինչ վերաբերում է Նիկոլ Փաշինյանին, ապա նա չի կարող չմտնել այդ դաշտ, քանի որ ի տարբերություն դաշինքում մյուսների, ինքն ունի վարկանիշ եւ փողոց դուրս չգալու դեպքում կարող է կորցնել այդ վարկանիշը: Իհարկե, Փաշինյանն է լրջորեն չի հավատում, որ հաջողության կհասնի, բայց իր համար կարեւորը փորձելն է, քանի որ պրոցեսի մեջ մտնելով ինքը փորձելու է պահպանել իր վարկանիշը: -Որքան էլ այդ պայքարը դատապարտված լինի ձախողման, չեք կարծո՞ւմ, որ ճիշտը փողոց դուրս գալն է,շահելու է նա, ով պայքարելու է, առջեւում ընտրություններ են ու այդ համատեքստում, երբ խոսվում է, որ Էդմոն Մարուքյանը իշխանությունից ունեցած ազդեցության պատճառով է մերժում փողոցը, ինչ եք կարծում չեն հաշվարկո՞ւմ այդ ամենը ոչ ռադիկալ այս ուժերը: -Միանշանակ համաձայն եմ, դրա համար էլ Նիկոլ Փաշինյանը դուրս է գալիս պայքարի: Իսկ առհասարակ Հայաստանի քաղաքական պատմության մեջ շատ դեպքեր են եղել, որ ուժը, որը համագործակցում է իշխանության հետ, մի ինչ որ պահի նորից սկսում է ընդդիմադիր հռետորաբանությամբ դրսեւորվել եւ վերականգնել կորցրած վարկանիշը: -Բայց այդ մեթոդն արդեն չի սպառե՞լ իրեն, արդյունավետ է: -Հայաստանում օրինակներ կան, որոնք արդյունավետ են: Ամեն դեպքում այդ ուժերը հույս ունեն, որ փողոցային պայքարով ոչինչ չի լինի եւ իրենք էլ կասեն, թե տեսեք մենք ասում էինք, որ ոչինչ չի լինի ու դրանով իրենք կշահեն: -Իսկ արտախորհրդարանական ընդդիմության պահվածքը ինչպե՞ս եք մեկնաբանում, կարծեք թե միայն Հանուն Հայաստան պետության ճակատն է պատրաստ պայքարել, մյուսները լռում են:Հատկապես ոչ վաղ անցյալում տիտղոսակիր ընդդիմության՝ ՀԱԿ-ի պահվածքը տրամաբանվա՞ծ է: -Ապրիլի 2-ի ընտրություններից հետո արտախորհրդարանական ուժերի վիճակը շատ ծանր է, առհասարակ քաղաքական ուժերի վիճակը ծանր է, որովհետեւ այդ ընտրություններին քաղաքական պայքար գրեթե գոյություն չուներ այդ ռեյտինգային ընտրակարգը նկատի ունենալով: Արտախորհրդարանական ուժերի ֆունկցիա այժմ գրեթե գոյություն չունի, եթե Ելք-ը կա խորհրդարանում եւ այդ ամբիոնը օգտագործելով կարող է գոյատեւել, ապա արտախորհրդարանականների գոյությունը կասկածի տակ է վերցված, նրանք չունեն հարթակ, որտեղ կարող են ելույթ ունենալ գոյատեւելու համար բացի ապագա ընտրություններին մասնակցելուց: -Հիմա Սերժ Սարգսյանի դեմ պայքար տանելը լավագույն հարթա՞կը չէ, ինչո՞ւ չեն օգտագործում այդ ուժերը: -Ես կարծում եմ, որ նրանք հիասթափված վիճակում են ու չեն հավատում հաջողությանը: Սակայն այստեղ կարեւորը այն է, որ փողոցը դառնա գործոն, եթե փողոցը գործոն դարձավ, ինչ որ մի փուլում դառնա լարվածության դաշտ, ապա այստեղ կարող է նոր պրոցեսներ ի հայտ գալ: -Նիկոլ Փաշինյանին կհաջողվի՞ լարվածության այդ դաշտն առաջացնել: -Այստեղ շատ նիկոլփաշինյաններ կան, որոնք կփորձեն գործել եւ եթե այդ մարդկանց քանակը շատ լինի ու կարողանան ակտիվորեն գործել, ապա շատ հնարավոր է լարվածության դաշտ առաջանա: -Իսկ ստվերային աջակիցներ, ֆիգուրներ կաջակցե՞ն Սերժ Սարգսյանի վարչապետության դեմ պայքարին: -Ես կարծում եմ, որ միշտ էլ ստվերային գործիչներ լինում են, որոն շահառուի դերում են հանդես գալիս, եթե փողոցը ակտիվանա, բնականաբար ստվերային գործիչների քանակն էլ կավելանա: Անի Սահակյան
Հետևեք մեզ Viber-ում
