ՀՀ-ն Նովգորոդի վեչեն չէ, որ ով բարձր գոռար, նա էլ որոշեր.Շարմազանովը՝Փաշինյանին

«Նախագահի այս 10 տարիները բարեփոխումների եւ պետականաշինության տարիներ են: Մարտահրավերներով ժամանակաշրջան է եղել եւ   գրեթե բոլոր ոլորտներում հասել ենք լուրջ հաջողությունների: Պարոն նախագահին հաջողվել է ունենալ ամուր բանակ եւ անվտանգ հասարակություն: Տարածաշրջանում դարձանք գործող, ոչ թե գործիք: Նախագահի վարած քաղաքականության արդյունքում Հայաստանը կարողացավ լինել ԵԱՏՄ անդամ, որը մեծ հնարավորություն է տնտեսական հզորության համար: Նրա վարած ճկուն քաղաքականության արդյունքում մենք ունենք քաղաքացիական հասարակություն եւ ազատ մամուլ: Գնացեք տեսեք այս 10 տարիների ընթացքում քանի ճանապարհներ ու մշակույթի տներ են կառուցվել»,-   խոսելով Սերժ Սարգսյանի ղեկավարման 10 տարիների մասին հայտարարեց ՀՀԿ ԳՄ նիստից հետո Էդուարդ Շարմազանովը: Հայաստանի Հանրապետական կուսակցությունը իշխանական կոալիցիայում «Ծառուկյան» դաշինքին ներառելու հարց չի քննարկել՝ անդրադառնալով մամուլի հրապարակումներին, որ ապագա կառավարության կազմում կարող է տեղ ունենալ նաև «Ծառուկյան» դաշինքը, որը կոալիցիա կկազմի իշխանությունների հետ: «Մենք այդ հարցը չենք քննարկել, երբ քննարկենք, ինչ որոշման էլ հանգենք, կգանք և կներկայացնենք»,-նշեց Շարմազանովը: «Որեւէ մեկը իրավունք չունի խոչընդոտել ոչ Շարմազանովի, ոչ Փաշինյանի  սահմանադրական իրավունքը ԱԺ-ում քվեարկություն իրականացնելու առումով։ Եթե ԵԼՔ  խմբակցությունը ունենար մեծամասնություն, որեւէ մեկը որ փորձեր սահմանափակել նրա քվեարկելու իրավունքը ու որոշելու իրավունքը՝ ով լինի վարչապետ, իրենք ինչպե՞ս կվերաբերվեին: Ոչ ոք չի կարող սահմանափակել իմ իրավունքը, որ ես որպես պատգամավոր քվեարկեմ: Հայաստանի Հանրապետությունը Նովգորոդի վեչեն չէ, որ ով բարձր գոռար, նա էլ որոշեր»,- անդրադառնալով ԵԼՔ խմբակցության ղեկավար Նիկոլ Փաշինյանի այն հայտարարությանը,որ փողոցային պայքարի ժամանակ չի բացառվում փակեն  Բաղրամյան պողոտան եւ թույլ չտան պատգամավորնեին մտնել վարչապետի ընտրության,ասաց  Շարմազանովը: