Վրաստանը պետք է օգտագործի Իրանի հնարավորությունները
Georgia Online-ի փոխանցմամբ՝ Վրաստանի էներգետիկայի նախարար Կախա Կալաձեն այսօր հաշվետվություն է ներկայացրել երկրի խորհրդարանում։ Պատգամավոր Զուրաբ Աբաշիձեն հիշեցրել է, որ ԶԼՄ-ները գրել էին, թե Իրանը ցանկանում է ջուր գնել Վրաստանից և հետաքրքրվել է, թե ինչ փուլում են գտնվում բանակցությունները։ Կալաձեն սակայն չի տվել կոնկրետ պատասխան և սկսել է խոսել ընդհանրապես Իրանի հնարավորություններից և հեռանկարում Վրաստանի համար դրա օգուտներից. «Իրանը նշանակալից ուղղություն է՝ հատկապես պատժամիջոցների վերացումից հետո։ Այդ երկիրն իր ռեսուրսներով ունի վիթխարի հնարավորություններ, և մենք պետք է անենք ամեն բան, որպեսզի առավելագույնս օգտագործենք այդ երկրի հնարավորությունները՝ լինի դա էներգետիկան, տրանսպորտը թե մյուս ուղղությունները։ Մենք քանիցս ապացուցել ենք, որ Վրաստանը Եվրոպայի ու համայն աշխարհի համար հուսալի երկիր է, և մենք ապագայում կանենք ամեն բան, որպեսզի միջազգային նախագծերն իրականացվեն Վրաստանի միջանցքի օգտագործմամբ։ Մենք հնարավորություն կունենանք ստանալ լրացուցիչ եկամուտներ, ստեղծել աշխատատեղեր»։
Հետևեք մեզ Viber-ում
