Թուրքիայի և ԵՄ-ի ծրագիրը հակասում է միջազգային իրավունքին

Փախստականների հարցերով ՄԱԿ-ի գլխավոր հանձնակատարի վարչությունում քննադատել են ներգաղթյաներին զանգվածաբար Հունաստանից Թուրքիա արտաքսելու ծրագրերը: «Հավաքական արտաքսումն արգելված է Մարդու իրավունքների եվրոպական կոնվենցիայով»,- ասել է Եվրոպայում վարչության ստորաբաժանման ղեկավար Վինսան Կոշետելը երեքշաթբի օրը՝ Ժնևում: Նա ընդգծել է, որ ԵՄ-ի և Թուրքիայի նման քաղաքականությունը կարող է հակասել եվրոպական և միջազգային իրավունքին: ՄԱԿ-ի գերագույն հանձնակատար Ֆիլիպո Գրանդին մտահոգություն է հայտնել Ստրասբուրգում՝ ելույթ ունենալով Եվրախորհրդարանի պատգամավորների առջև: «Ես խորապես տագնապած եմ հավաքական արտաքսում թույլ տվող ցանկացած դրույթով, որոնք հաշվի չեն առնում միջազգային իրավունքում գրված՝ փախստականների պաշտպանության մեխանիզմները»,- ասել է նա: Ներգաղթյալներին կարելի է արտաքսել միայն այն երկրներ, որտեղ նրանք կարող են ապաստանի տրամադրման միջնորդագիր ներկայացնել և հասանելիություն ունենալ կրթությանը, բուժսպասարկմանն ու աշխատանք փնտրելու հնարավորությանը: Մինչդեռ Թուրքիան ներգաղթյալների մեծ մասին միայն ժամանակավոր պաշտպանություն է հատկացնում, սակայն նրանք իրավունք չունեն ներկայացնելու ապաստանի տրամադրման միջնորդագիր: Մասնավորապես, խոսքը Իրաքի և Աֆղանստանի քաղաքացիների մասին է: