Շարքային Սարգսյանի օրագիրն ու ծրագիրը
«Ժամանակ» թերթը գրում է. «Սերժ Սարգսյանը շարքային կուսակցական է եւ պետք է ենթարկվի կուսակցության որոշումներին, խորհրդարանում հայտարարել է ՀՀԿ խմբակցության ղեկավար Վահրամ Բաղդասարյանը՝ անդրադառնալով 2014 թվականին Սարգսյանի արած հայտարարությանը, թե չի հավակնում վարչապետի պաշտոնին: Վահրամ Բաղդասարյանն ասել է, թե իրենք հավակնություններով կամ ցանկություններով չեն առաջնորդվում եւ իշխանության պատասխանատվությունը ստանձնած կուսակցություն են, ու իրենք են որոշում, թե որ պաշտոնն ով պետք է զբաղեցնի: Որեւէ այլ իրավիճակում, անշուշտ, մեղմ ասած զավեշտալի կլիներ պատկերացնել որեւէ ՀՀԿ-ականի, որը կասեր, թե Սերժ Սարգսյանը շարքային կուսակցական է եւ պարտավոր է ենթարկվել կուսակցության որոշումներին՝ անկախ իր ցանկություններից: Բայց տվյալ պարագայում այդ հանգամանքը դարձել է Սերժ Սարգսյանի «դեմքը փրկելու» միակ տարբերակը, 2014-ին նրա արած հայտարարությունից հետո:
Բանն այն է, որ Սարգսյանի վարչապետության համար մնում է միակ «տրամաբանական» տարբերակը՝ ՀՀԿ պարտադրանք, անկախ իր կամքից, զուտ կուսակցական կարգապահության շրջանակում: Որովհետեւ «ազգովի խնդրանքի» տարբերակը շատ ավելի ծիծաղելի կստացվեր, իսկ Սերժ Սարգսյանի «կամքով» վարչապետությունը՝ շատ անհարմար: Միակ տարբերակը ՀՀԿ որոշումն է, պարտադրանքը, որին իբրեւ շարքային ենթարկվում է Սերժ Սարգսյանը: Իհարկե, երեւի թե դա կլինի առաջին ու վերջին դեպքը, երբ Սերժ Սարգսյանն է ենթարկվում ՀՀԿ-ին, ոչ թե հակառակը:
Եվ դա էլ, իհարկե, կլինի Սերժ Սարգսյանի կամքով, որտեղ էական նշանակություն կունենա թերեւս ոչ այնքան հանրության առաջ որեւէ տրամաբանական բացատրություն գտնելը, այլ նաեւ միջազգային հանրությանը ներկայացնելը, որ Սարգսյանը ոչ թե գնում է իշխանությունը պահելու, այսպես ասած, «խանական» տարբերակով, այլ ընդամենը դասական «քաղաքագիտական»՝ իշխող կուսակցությունն իր նախագահին թելադրում է վարչապետի պաշտոնի վերաբերյալ որոշում: Ինչ խոսք, հազիվ թե արտաքին ուժային կենտրոններում որեւէ մեկի համար այդ «քաղաքագիտությունը» լինի համոզիչ, բայց մյուս կողմից էլ այստեղ կա մի առանցքային խնդիր՝ այդ կենտրոնները կանգնած են Հայաստանում իշխանության պատասխանատվության ճգնաժամի առաջ: Այսինքն՝ չկա մարդ, որը հավակներ այդ պատասխանատվությունը ստանձնելուն»: Առավել մանրամասն՝ թերթի այսօրվա համարում
Հետևեք մեզ Viber-ում
