Մի ստորացրեք Ռուսաստանը, նրա տղամարդկանց. կոչ`Պուտինին
Ռուսաստանյան РЕН-ТВ հեռուստաալիքի հիմնադիր Իռենա Լեսնևսկայան Ռուսաստանի նախագահ Պուտինին կոչ է արել իրեն տղամարդու պես պահել և ազատ արձակել ուկրաինուհի օդաչու Իրինա Սավչենկոյին: «Ազատության» ռուսալեզու ծառայությունը հայտնում է, որ Լեսնևսկայան բաց նամակ է հրապարակել սոցցանցերում: Դրանում ուշադրություն է հրավիրվել այն բանի վրա, որ ամբողջ աշխարհի աչքի առաջ ռուսական բանտում մահանում է մի կին, որը հացադուլ է հայտարարել: Այս համատեքստում Լեսնևսկայան դիմել է այն ամեն «մարդկայինին, քրիստոնեականին, տղամարդկայինին», որ կա Պուտինի մեջ, որպեսզի նա ազատ արձակի Սավչենկոյին: Մասնավորապես առաջարկվել է նրան փոխանակել ռուսաստանցի ռազմագերիների հետ: «Մի ստորացրեք Ռուսաստանը, նրա տղամարդկանց, սպաներին, որոնց մեջ դեռևս պատվի մասին պատկերացումներ կան», - Պուտինին է դիմել Լեսնևսկայան: Անցած շաբաթ Սավչենկոն ազատազրկման էր դատապարտվել՝ Լուգանսկում երկու լրագրողների սպանության մեղադրանքով: Սավչենկոյի գործով դատավճռից հետո Մոսկվայի և Կիևի հարաբերությունները ավելի էին սրվել:
Հետևեք մեզ Viber-ում
