Անհրաժեշտ ¼ ձայները հավաքվել են. Վահրամ Բաղդասարյանը մանրամասնում է
Ազգային ժողովում Հայաստանի Հանրապետության 4-րդ նախագահի ընտրության հարցի քննարկումները կմեկնարկեն մարտի 1-ին, իսկ քվեարկությունը տեղի կունենա մարտի 2-ին: Ազգային ժողովում լրագրողների հետ զրույցում այս մասին հայտնեց Ազգային ժողովի ՀՀԿ խմբակցության ղեկավար Վահրամ Բաղդասարյանը: Նա նաև տեղեկացրեց, որ առաջադրման համար անհրաժեշտ ¼ ձայները հավաքվել և ուղարկվել են ԱԺ քարտուղարություն: «Այսօրվա հանդիպումն ամփոփում էր, քանի որ Արմեն Սարգսյանը ներկայացրեց իր՝ տարբեր խմբերի հետ ունեցած հանդիպման արդյունքները, ասաց, թե ինչու է որոշել այս ծանր բեռը վերցնել իր վրա: Այսօր միասնական՝ ՀՅԴ-ի հետ, ստորագրահավաք կազմակերպեցինք և որոշեցինք Արմեն Սարգսյանին առաջադրել հանրապետության 4-րդ նախագահի թեկնածուի պաշտոնում»,- նշեց Բաղդասարյանը: ՀՀԿ-ի կողմից ՀՀ նախագահի թեկնածու առաջարկված Արմեն Սարգսյանը փետրվարի 23-ին խորհրդարանում հանդիպել է իշխող կոալիցիան ներկայացնող քաղաքական ուժերի՝ ՀՀԿ-ի և ՀՅԴ-ի խմբակցությունների պատգամավորների հետ: Հանդիպման ընթացքում որոշվել է, որ ՀՀԿ-ն և ՀՅԴ-ն ՀՀ նախագահի պաշտոնում կառաջադրեն Արմեն Սարգսյանի թեկնածությունը:
Հետևեք մեզ Viber-ում
