Վհուկ գալի՞ս են, թե դառնում.ինչու չի նկատում Գասպարյանը

Սարգսյանին զուգահեռ ոստիկանապետ Վովա Գասպարյանն էլ է ընկել իր ղեկավարած համակարգի ջանին ու զանգվածաբար կադրային ջարդ է անում՝ հեռացնելով համակարգն իբր արատավորողներին ու վհուկներին, որոնք ապականում են ոստիկանական համազգեստը։ Մի քանի բարձրաստիճան ոստիկանների կոտորածն իրականացնելուց եւ մի Մաշտոցի ամբողջ անձնագրային բաժնի աշխատակիցներին ազատելուց հետո Վովա Գասպարյանը նոր նշանակումներ կատարեց և այդ առիթով մի ընդարձակ ելույթ ունեցավ կոլեգիայի նիսոտում, որի հիմնական գաղափարն այն էր, թե «Կրիմինալ սիրող ոստիկանները վհուկներ են` մտած մեր համազգեստի մեջ» և ինքն այսուհետ ևս պայքարելու է նույն ոգով, քանի որ «իր համառությունը՝ ոստիկանությունը բարեփոխելու, սահման չունի»: Գասպարյանն անձնակազմից պահանջել է բացառել «ոստիկանին ու ոստիկանությանն արատավորող ցանկացած երեւույթ, անհանդուրժող լինել բոլոր նրանց հանդեպ, ովքեր իրենց վարքով ու գործողություններով հակադրվում են «Ծառայելով օրենքին՝ ծառայում ենք ժողովրդին» հիմնարար սկզբունքի կենսագործմանը» ասել է Գասպարյանը ու նաեւ ընդգծել, թե ինքը անգրագիտության համար չի հեռացրել ոստիկանին, քանի դեռ չի սովորեցրել։ Ստացվում է, որ Վովա Գասպարյանը ոչ թե ղեկավարում է Հայաստանի կարեւորագույն հաստատություններից մեկը, որի գործունեությունից է բխում ՀՀ քաղաքացիների պաշտպանվածության, անվտանգության եւ այլ կարեւոր հարցեր, այլ ուսումնական մի հաստատություն, որտեղ զբաղված է մանկավարժական գործունեությամբ։ Ինչ է նշանակում մինչեւ չեմ սովորեցնում... հարց է առաջանում՝ իսկ ինչու է բարեփոխիչ Վովա Գասպարյանը թույլ տալիս, որպեսզի համակարգում աշխատանքի անցնեն իր խոսքով՝ անգրագետներ։ Չէ՚՞որ ոստիկանի անգրագետ ոստիկանի գործողությունը նվազագույնը կարող է ճակատագրեր խեղել, վնասել, եթե չասենք ամբողջովին խլել։ Այսինքն հարկավոր է ոչ թե համակարգը բարեփոխել, այլ այն ձեւավորել ոստիկաններից, ոչ թե անգրագետներից։ Եւ հենց այստեղ է, որ մեկ այլ հարցական է առաջ գալիս՝որտեղի՞ց են գալիս այդ «վհուկները»: Դրսից արդեն վհուկ դարձած գալիս են իրավապահ համակա՞րգ, թե՞ գալիս ու ներսում են վերածվում վհուկների: Եթե դրսից են գալիս, ապա ոստիկանապետը պարտավոր էր դա նկատել: Եթե ներսում են դառնում վհուկ, ապա ո՞ւմ է մեղադրում Վովա Գասպարյանը, որը, փաստորեն, վհուկներ բուժելու համակարգի ղեկավարումով է զբաղվում։ Այնպես որ ,եթե ոստիկանապետի այս քայլը հերթական շոուն չէ, որով փորձ է արվում համակարգի առողջացման իմիտացիա ստեղծել ու նախեւառաջ պատրանք, որ ոստիկանապետն անհանդուրժող է արատավոր երեւույթների, այսկերպ բարեփոխումներն առաջ տանելը մեղմ ասած անմեղսունակություն է։ Էլ չենք խոսում, որ տարիների փորձը ապացուցել է, որ կադրային շարժով հնարավոր չէ բարեփոխումների նույնիսկ իմիտացիա ստեղծել։ Որովհետեւ այսօր որեւէ բարձրաստիճան ոստիկան կարող է ազատ արձակվել իր պաշտոնից, բայց շատ չանցած նշանակվել մեկ այլ պաշտոնում։ Իրականում սա ավելի է կազմաքանդում և որակազրկում համակարգը, քանզի նոր աշխատանքի անցնող ցանկացած աշխատակից կամա թե ակամա պիտի մտածի, որ ինքն այդ տեղում ժամանակավոր է, ամեն րոպե կարող է գլուխ բարձրացնել Գասպարյանի բարեփոխում անելու անկոտրում կամքը։   Անի Սահակյան