Ինչ էր խնդրել Արմեն Սարգսյանը Արամ Սիմոնյանից. ԵՊՀ ռեկտորը բացեց փակագծերը

Այսօր ՀՀ հաջորդ նախագահի պաշտոնում Հանրապետական կուսակցության կողմից առաջադրված թեկնածու Արմեն Սարգսյանն այցելել է Երեւանի պետական համալսարան, հանդիպում է ունեցել ԵՊՀ գիտխորհրդի անդամների հետ: Արմեն Սարգսյանը հանդիպմանը կարեւորել է քաղաքական ուժեղ համակարգի, տնտեսության զարգացման եւ առողջ հասարակության ստեղծումը: ԵՊՀ ռեկտոր Արամ Սիմոնյանը լրագրողների հետ զրույցում նշեց, որ  Արմեն Սարգսյանն ասել է, որ 21-րդ դարում ուժեղ Հայաստան ունենալու համար պետք է ամենօրյա դժվարին աշխատանք ոչ միայն տնտեսության ոլորտում, այլ անհրաժեշտ է ստեղծել քաղաքական ուժեղ համակարգ, առողջ հասարակություն: «Արմեն Սարգսյանը օտար չէ համալսարանին: Արմեն Սարգսյանի հետ, գոնե ես, առաջին անգամ հանդիպել եմ 1986 թվականին, երբ եկա համալսարան, իսկ նա արդեն դասախոսում էր տեսական ֆիզիկայի ամբիոնում: Նա համալսարանը շատ լավ գիտի, այստեղ շատ երկար տարիներ է անցկացրել եւ իր կապերը երբեք չի կտրել համալսարանի հետ»: Թե ինչու հանդիպման ժամանակ լրատվամիջոցների ներկայացուցիչներին ԵՊՀ անվտանգության աշխատակիցները թույլ չեն տվել մտնել ԵՊՀ շենք, Արամ Սիմոնյանը նշեց. «Զարմանալի բան եք ասում, որովհետեւ ոչ ոք ոչ մեկի նման բան չի արտոնել: Արմեն Սարգսյանի խնդրանք էր ուղղակի հնարավորություն տալ այսօր հարցազրույց չտալ»: Նշենք, որ արդեն մի քանի օր է՝ ինչ ՀՀԿ թեկնածու Արմեն Սարգսյանը հանդիպումներ է կազմակերպում կուսակցությունների եւ հասարարակական գործիչների հետ, և ամեն անգամ խույս է տալիս լրագրողների հետ հանդիպումից: Ինչպես նախորդ օրերին, այնպես էլ այսօր նա այնպիսի իրավիճակ ստեղծեց, որպեսզի չհանդիպի լրագրողներին և չպատասխանի, գուցե իրեն համար տհաճ, հարցերի: