Եվրոպական պետությունները ոչ թե խաղաղություն բերեցին, այլ կանաչ լույս վառեցին նոր արհավիրքների համար

ՀՀԿ խոսնակ Էդուարդ Շարմազանովը գրում է․ «1938-ի սեպտեմբերի 30-ին եվրոպական քառյակը Մյունխենում «փուռը տվեց» Չեխոսլովակիայի Սուդեթական մարզը,իսկ 2022-ի հոկտեմբերի 6-ին Պրահայում Շառլ Միշելն ու Մակրոնը քաջալերեցին Արցախի հանձնումն Ադրբեջանին։

1938-ի սեպտեմբերի 30-ը եվրոպական տերությունների բացահայտ ցինիզմի օրն է խորհրդանշում։ Այդ օրը Ֆրանսիան,Մեծ Բրիտանիան, Իտալիան եւ Գերմանիան առանց Չեխոսլովակիայի որոշեցին նրա ճակատագիրը՝ Սուդեթական մարզը հանձնելով Գերմանիային։

Ֆրանսիան եւ Մեծ Բրիտանիան Սուդեթական մարզի բռնակցմանն իրենց համաձայնությունը փորձում էին բացատրել նրանով, որ Գերմանիան խոսք է տվել Եվրոպայում այլեւս որեւէ նոր տարածքային փոփոխություն չանել։

Ֆրանսիան, մոռանալով ֆրանս-չեխական դաշինքի մասին, «փուռը տվեց» իր դաշնակցին, իսկ Մեծ Բրիտանիայի վարչապետ Չեմբեռլենն իր համաձայնությունը հիմնավորում էր «խաղաղություն բերելու» հեռանկարով։

Արդյունքում, կարճ ժամանակ հետո, սկսվեց Երկրորդ աշխարհամարտը, Փարիզն ընկավ, իսկ Լոնդոնը հայտնվեց գերմանական օդուժի ռմբակոծության տակ։

Տասնամյակներ անց եվրոպական կառույցների հովանավորությամբ ու քաջալերմամբ 2022-ի հոկտեմբերի 6-ին Պրահայում ՀՀ վարչապետն Արցախը ճանաչեց Ադրբեջանի մաս։

Այս ամոթալի գործարքում մեծ է Շառլ Միշելի ու Էմանուել Մակրոնի դերակատարությունը։

Արցախն Ադրբեջանի մաս ճանաչելուց երկու ամիս անց սկսվեց Արցախի բլոկադան, իսկ 2023-ի աշնանը ՝ արցախահայերի բռնագաղթը Արցախից։

Թե 1938-ին եւ թե 2022-ին եվրոպական պետությունները ոչ թե խաղաղություն բերեցին, այլ կանաչ լույս վառեցին նոր արհավիրքների համար»։