Միլիարդատերերն ավելացրել են սուպերզբոսանավերի գնման ծախսերը

Անցյալ տարի մոլորակի ամենահարուստ մարդիկ, չնայած ճգնաժամին, ավելացրել են 24 մետրից ավելի երկարությամբ սուպերզբոսանավերի ձեռք բերման ծախսերը: Այս մասին ասվում է The Wealth Report-ում: Ընդհանուր առմամբ նման ծախսերն աճել են 40 տոկոսով: Սուպերզբոսանավեր արտադրող Y.Co ընկերության գլխավոր տնօրեն Չարլի Բիրքեթի խոսքով՝ վաճառքի ծավալները մոտեցել են 2000-ականների սկզբի մակարդակին: Նա հույս ունի, որ ընթացիկ տարվա վերջին կվաճառվի 48 սուպերզբոսանավ՝ ավելի քան 100 մետր երկարությամբ: Բիրքեթն ասել է նաև, որ եթե նախկինում մարդիկ նախընտրում էին մի քանի տախտակամածով զբոսանավեր, ապա այժմ նախընտրում են միայն մեկ ընդարձակ տախտակամածով: Նրա խոսքով՝ այժմ գնորդներն ավելի երիտասարդներն են: