Գնդապետը քննադատում է ՊՆ նախարարին. «Ինչ-որ մի գրագիր, որն ամբողջ կյանքում բանակի հետ կապ չի ունեցել, աթոռից աթոռ առաջ է գնացել»

Այսօր Հայելի ակումբում լրագրողների հետ հանդիպմանն արցախյան եւ ապրիլյան պատերազմների մասնակից գնդապետ Վոլոդյա Հովհաննիսյանը նշեց, որ ՊՆ նախարար Վիգեն Սարգսյանը բանակում փուձում է փոփոխություններ անել, սակայն նա բացասական է գնահատում նրա գործունեությունը: «Վիգեն Սարգսյանը բարոյապես և մարդկայնորեն իրավունք չուներ ստանձնելու պաշտպանության նախարարի պոստը: Ինչ-որ մի գրագիր, որն ամբողջ կյանքում բանակի հետ կապ չի ունեցել, աթոռից աթոռ առաջ է գնացել և լուռումունջ՝ բացասական գնահատական է տալիս Բաղմանյան Հայկազին: Բաղմանյան Հայկազը ոչինչ այդպիսի չի արել: Բաղմանյան Հայկազին կարելի էր այդ չարաշահման համար քրեական գործ հարուցել, եթե արել էր, թող անեին…Հայկազ Բաղմանյանը զինվորի հետ ոչ մի առնչություն չի ունեցել, կորպուսի հրամանատար է եղել, եղել է գլխավոր շտաբի պետի տեղակալ ու իրեն հանում են՝ ասելով՝ պարտականությունները պատշաճ չկատարելու համար: Հասկանո՞ւմ եք, որակումն էր սխալ, ձեւակերպումն էր վիրավորական: Համապատասխան մեղադրանք ներկայացնողը այդպես չպետք է աներ փառապանծ գեներալին: Եթե սխալ էր կատարել՝ դատեիք, գնդակահարեիք: Չի կարելի հեղինակազրկել այդ աստիճան»,- ասաց նա: Նրա խոսքով մեր ամենօրյա զոհերը ցույց են տալիս, որ  մեր բանակը գործում է.  «Դա նշանակում է, որ մեր բանակի դեմ կանգնած է թշնամի, որը ցանկանում է իր համապետական, ռազմական նպատակներն իրագործել, դա նշանակում է, որ մենք մարտնչում ենք, դա նշանակում է, որ մեր ազգը զոհում է իր լավագույն զավակներին՝ հանուն մեր գոյության: Իհարկե ցավ է, բայց ազգն իր գոյության համար արյուն է պահանջում»: