Ո՞ւմ մեղքով

Սերժ Սարգսյանի հրամանագրերով էներգետիկայի նախարար Երվանդ Զախարյանը ազատվեց պաշտոնից, նրան փոխարինեց Լևոն Յոլյանը: «Ծանր փուլում ենք գտնվում, համագործակցության, քննարկումների փուլում ենք գտնվում, և ես համոզված եմ, որ այս կարճ ժամանակահատվածում Դուք կմտնենք աշխատանքի մեջ և կփորձեք համապարփակ աշխատանքները առաջ տանել»,- նորանշանակ նախարարին ասել է վարչապետը։ Հովիկ Աբրահամյանին լրագրողները խնդրել էին մանրամասնել՝ ի՞նչ ծանր փուլի մասին է խոսքը: «Նկատի ունեմ բանակցությունները. Ռուսաստանի Դաշնության հետ հիմա գազի սակագնի պայմանագիրն է քննարկվում, Իրանի Իսլամական Հանրապետության հետ երրորդ գծի կառուցման աշխատանքներն են, Վրաստանի Հանրապետության հետո էլեկտրագծերի կառուցման երկու ծրագիր է ընթանում»,- հայտարարել է Աբրահամյանը։ «Իրանի հետ գազի գնման շուրջ բանակցություններ տարվո՞ւմ են»։ «Գազի գնման մասին չէ խոսքը, գազի պայմանագրի։ Դուք տեղյակ եք, որ մենք գազը ստանում ենք Իրանի Իսլամական Հանրապետությունից և փոխարենը փոխհատուցում ենք էլեկտրաէներգիայով։ Միայն այդ գործարքի շրջանակներում են [ընթանում բանակցությունները]»,- պատասխանել է վարչապետը։ Վարչապետի պնդումը, թե Հայաստանը բանակցություններ չի վարում Իրանի հետ գազ գնելու շուրջ, ըստ էության, հակասում է փոխվարչապետ Վաչե Գաբրիելյանի՝ ԱԺ-ում մոտ մեկ ամիս առաջ արած հայտարարությանը: Իրականում, Հովիկ Աբրահամյանը փաստել է, որ Հայաստանը` Ռուսաստանի- Վրաստան-Իրանի տարվող բանակցությունների արդյունքում առայժմ Հայաստանի համար որևէ լավ լուր չի ունի: Այսպես ասած, ամեն ինչ դեռ քննարկման փուլում է: Հարց է ծագում` ինչու՞, ու՞մ մեղքով... Հայաստանի իշխանությունները մոնոպոլ իրավունքներ են տվել «Գազպրոմ»-ին: Այժմ ստիպված են գազը գնել միայն Ռուսաստանից: Այդ իսկ պատճառով, Ռուսաստանը, Վրաստանն ու Իրանը գազային բանակցություններ են վարում և ըստ էության, քննարկելով ընդամենը Հայաստանի տարածքի հարցը: Իհարկե, մեր իշխանությունները այլ աղբյուրներից, մասնավորապես, Իրանից գազ գնելու հնարավորությունների առումով կարող են անընդմեջ ասել, թե սահմանափակումներ չկան ու շարունակաբար բանակցություններ են ընթանում: Բայց մեկ պարզվում է, որ իրանական կողմի հետ դժվար է բանակցել, կամ նրանք ոչ բարենպաստ պայմաններ են առաջ քաշում, դե իսկ ռուսական կողմն էլ բանակցում է Հայաստանի հարևանների հետ` Հայաստանի փոխարեն: Իսկ ո՞ւմ մեղքով: Ինչ ցանել ենք, այն էլ հնձում ենք... Թամար Բագրատունի