Հրապարակվեց «Լիա» գեղեցկության սրահում սպանվածի կնոջ ցուցմունքը
Չարբախում մեկ տարի առաջ «Լիա» գեղեցկության սրահում տեղի ունեցած սպանության գործով այսօր Շենգավիթ վարչական շրջանի իրավասության դատարանում հրապարակվեց այս գործով տուժողի իրավահաջորդ Մուշեղ Մուշեղյանի կնոջ՝ Նարինե Հովհաննիսյանի նախաքննական ցուցմունքը:Ըստ վկայի նախաքննական ցուցմունքի՝ դեպքի նախորդ օրը ամուսինն առավոտյան տանից դուրս է եկել՝ հայտնելով, որ ընկերների հետ է լինելու և այդ օրը տուն չի գալու: Սպանվածի կինը հայտնել է, թե տեղյակ չէ՝ ամուսինը թշնամիներ ուներ, թե` ոչ: Ըստ ցուցմունքի՝ Նարինե Հովհաննիսյանն ասել է, որ չի ճանաչում միջադեպի մասնակիցներից ոչ մեկին: Նարինե Հովհաննիսյանը դատարան չէր ներկայացել եւ դատարանին գրությամբ հայտնել էր, որ չի ցանկանում ներկա լինել դատական նիստերին և ցանկանում է, որ հիմք ընդունեն իր նախաքննական ցուցմունքը: Այսօրվա դատական նիստին չէին ներկայացել նաև դատակոչված եւս 3 վկա: Դատարանը որոշեց բերման ենթարկել Վիրաբ Գասպարյանին և Դավիթ Հախանումյանին: Դատարանը Վիրաբ Գասպարյանին բերման ենթարկելու որոշում կայացրել էր դեռեւս 2017 թվականի դեկտեմբերին: Այսօր Շենգավիթ վարչական շրջանի ընդհանուր իրավասության դատարանի դատավոր Նելլի Բաղդասարյանը սույն սպանության գործով նիստին դատավարության մասնակիցներին տեղեկացրեց, որ դատարանը ստացել է պատասխան, համաձայն որի ոստիկանության աշխատակիցները այցելել են Վիրաբ Գասպարյանի բնակարան՝ նրան հայտնաբերելու եւ բերման ենթարկելու համար, սակայն այցելությամբ պարզվել է, որ Գասպարյանը բացակայում է բնակության վայրից եւ ըստ նրա հոր՝ որդին բացակայում է Երեւան քաղաքից եւ գտնվում է Արցախում: Նույն հաջողությամբ ոստիկանները չեն կարողանում հայտնաբերել նաեւ Երրորդմասցի Լյովիկի եւ նրա երկու ընկերների սպանության գործով ամբաստանյալ, քրեական հեղինակություն համարվող Սարգիս Հախանումյանի եղբորը՝ Դավիթ Հախանումյանին: Սույն գործով հաջորդ դատական նիստը կշարունակվի փետրվարի 7-ին ժամը 14:00-ին: Գործով մնացել է հարցաքննել Վիրաբ Գասպարյանին, Դավիթ Հախանումյանին եւ Ռուբեն Խաչատրյանին:
Հետևեք մեզ Viber-ում
