Հայտնի է, թե որքան գումար է շահել Ծառուկյանը Գեյջիի հաղթանակի շնորհիվ

UFC-ի թեթև քաշային կարգի վարկանիշային աղյուսակի երկրորդ համար Արման Ծառուկյանը 5,7 միլիոն դոլար է շահել «UFC Freedom 250» մրցաշարի գլխավոր իրադարձությունում Իլիա Թոփուրիայի նկատմամբ ամերիկացի Ջասթին Գեյջիի հաղթանակի շնորհիվ։ Այս մասին տեղեկանում ենք armsport.am-ից:

Մրցաշարի մեկնարկից առաջ Հայաստանը ներկայացնող մարտիկը սոցիալական ցանցերում հայտնել էր, որ 1 միլիոն դոլար խաղադրույք է կատարել Գեյջիի հաղթանակի վրա։ Ըստ գործակիցների՝ հնարավոր շահումը կազմում էր 5,7 միլիոն դոլար։

Մենամարտը կայացել է Վաշինգտոնում՝ Սպիտակ տան Հարավային մարգագետնում, և ավարտվել Գեյջիի հաղթանակով՝ տեխնիկական նոկաուտով։ Երրորդ ռաունդում ամերիկացին Թոփուրիային ենթարկել է նոկդաունի, իսկ չորրորդ ռաունդից հետո մենամարտը դադարեցվել է։

37-ամյա Գեյջիին այս հաջողությունը բերեց կարիերայում առաջին չեմպիոնական տիտղոսը UFC-ի թեթև քաշային կարգում։ Այժմ նրա ակտիվում կա 28 հաղթանակ և 5 պարտություն։

Ինչ վերաբերում է 29-ամյա Թոփուրիային, ապա նա կրեց պրոֆեսիոնալ կարիերայի առաջին պարտությունը։ Մինչ այս մենամարտը վրաց-իսպանացի մարզիկն ուներ 17 անընդմեջ հաղթանակ։