ՍԱՐՍԱՓԵԼԻ ԱՐՏԱՀՈ՞ՍՔ ԱԱԾ-ԻՑ

Համացանցի ադրբեջանական սեգմենտում ակտիվորեն շրջանառվում է տեսանյութ, որը, ըստ տարածվող պնդումների, կարող են լինել «Զվարթնոց» օդանավակայանի սահմանապահ ծառայության անվտանգության տեսախցիկներից արտահոսած կադրեր։

Եթե տեսանյութի իսկությունը հաստատվի, ապա խոսքը պարզապես հերթական տեղեկատվական միջադեպի մասին չէ։ Դա կնշանակի, որ արտահոսքի է ենթարկվել Հայաստանի ազգային անվտանգության համակարգի կարևոր ենթակառուցվածքներից մեկի տեսահսկման ցանցը։

Ավելին, այս արտահոսքը եղել է հայ գերիներին խոշտանգող Իլհամ Ալիևի օգնական Հաջիևի` Հայաստան այցի օրերին։

Այս դեպքում առաջանում են մի շարք լրջագույն հարցեր.

Ինչպե՞ս են այդ կադրերը հայտնվել ադրբեջանական տեղեկատվական տիրույթում։ Ո՞վ է պատասխանատու եղել տվյալ համակարգերի պաշտպանության համար։
Արդյոք վտանգված են միայն «Զվարթնոցի» տեսախցիկները, թե՞ խոսքը շատ ավելի լայն անվտանգության խոցելիության մասին է։
 Եթե հնարավոր է եղել ստանալ ԱԱԾ սահմանապահ ծառայության տեսագրությունները, ապա ինչպիսի՞ երաշխիք կա, որ Հայաստանի այլ պետական կամ ռազմավարական օբյեկտների տեսահսկման համակարգերը նույնպես չեն վերահսկվում կամ կոտրվել։

Եթե արտահոսքի փաստը հաստատվի, հանրությունը պարտավոր է ստանալ ամբողջական բացատրություն, իսկ պատասխանատու պաշտոնյաները պետք է կրեն քաղաքական և ծառայողական պատասխանատվություն։

Այս դեպքում դժվար կլինի խուսափել հարցից, թե արդյոք իրենց պաշտոններում պետք է շարունակեն մնալ ԱԱԾ տնօրեն Անդրանիկ Սիմոնյանը և ՀՀ ԱԱԾ սահմանապահ զորքերի հրամանատար, գնդապետ Գարիկ Մուրադյանը։

Ազգային անվտանգության համակարգում նման մակարդակի ձախողումները չեն կարող մնալ առանց պատասխանատվության։