«Երկու օր ա՝ լեզվին են տալիս Ռուսաստանի դեմ, իրենց բոլոր մեղքերը փաթաթում են հիմա էլ ՌԴ–ի վզին». Քոչարյան
Երկրի գործող իշխանությունները թույլ են տվել բոլոր հնարավոր սխալները՝ պատերազմից ու տարածքային կորուստներից մինչև դաշնակիցների հետ հարաբերությունների վատթարացում և տնտեսական ռիսկերի խորացում։ Այս մասին այսօր՝ մայիսի 16-ին, Վեդիում ընթացող նախընտրական քարոզարշավի ժամանակ հայտարարել է Հայաստանի երկրորդ նախագահ, ընդդիմադիր «Հայաստան» դաշինքի առաջնորդ Ռոբերտ Քոչարյանը։
Նա հիշեցրել է, որ իշխանությունները «հրահրել են պատերազմ», որը հանգեցրել է ավելի քան հինգ հազար մարդու մահվան և տարածքային կորուստների։ Քոչարյանը երկրի ղեկավարությանը մեղադրել է նաև այն բանում, որ պատերազմից հետո վտանգի տակ են հայտնվել արդեն բուն Հայաստանի տարածքները։ Նրա խոսքով՝ այսօր իշխանությունները գնում են իրավիճակի հետագա վատթարացման ճանապարհով և փաստացի երկիրը տանում են դեպի սոցիալական խնդիրներ ու աղքատություն։
Քոչարյանն առանձնակի ուշադրություն է դարձրել Ռուսաստանի հետ հարաբերություններին։ Նա քննադատել է իշխանության ներկայացուցիչների հակառուսական հռետորաբանությունը՝ հայտարարելով, որ նրանք փորձում են իրենց բոլոր սխալները բարդել Մոսկվայի վրա՝ միևնույն ժամանակ անտեսելով հայկական Ռուսաստանից և ԵԱՏՄ կառույցներից տնտեսության կախվածությունը։
Նրա խոսքով՝ Հայաստանը ռիսկի է դիմում մնալ առանց դաշնակիցների ու ընկերների՝ իր ճակատագիրն ամբողջությամբ կախվածության մեջ դնելով Ադրբեջանի նախագահ Իլհամ Ալիևի կամքից ու քմահաճույքներից։
«Երբ մենք մեղադրում ենք իշխանություններին պատերազմը հրահրելու և 5000-ից ավելի մարդկանց կորցնելու մեջ, ի՞նչ են նրանք մեզ ասում։ «Ինչո՞ւ եք ուռճացնում թիվը։ Զոհերի թիվը շատ ավելի քիչ է, քան 5000-ը»»։
«Հիմա իմ հարցը հետևյալն է. դուք այդ երիտասարդներին, որ զորակոչել եք, զինկոմիսարիատներով ցուցակներ ունեցե՞լ եք, թե՞ ոչ։ Մարդիկ անուն-ազգանուններ ունեցե՞լ են, թե՞ ոչ։ Որ բերել եք «զբոռնի պունկտեր», մեքենա նստեցրել ու ուղարկել պատերազմ, նրանք անուններ ունեցե՞լ են, թե՞ ոչ։ Դագաղները, որ հետ են եկել, համարներով են հետ եկել։ Հիմա ասում ենք՝ հրապարակեք, հարգեք էդ մարդկանց հիշատակը։ Մի հուշամատյան սարքեք։ Եթե մենք սխալ ենք թույլ տվել թվերի մեջ, մենք ներողություն կխնդրենք։ Խոսքը թվերի մասին չէ։ Ժողովուրդը, որը չի հարգում իր հերոսներին, չի պատվում իր հերոսներին, հերոսներ երբեք չի ունենում։ Սա պարզ ճշմարտություն է», - հայտարարել է նա։
Հայաստանի երկրորդ նախագահի կարծիքով՝ գործող իշխանությունը փորձում է խզել հասարակության կապը անցյալի, պատմության և ազգային ինքնության հետ։
Այս համատեքստում նա անդրադարձել է նաև ազգային խորհրդանիշների թեմային։ Քոչարյանը հայտարարել է, որ իշխանությունները պայքար են մղում նույնիսկ Արարատ լեռան դեմ։ Նրա խոսքով՝ եթե հնարավորություն լիներ, իշխանությունները պատ կշարեին, որպեսզի հայերը նույնիսկ չտեսնեին Արարատը։
Ամփոփելով իր ելույթը՝ Քոչարյանը համակիրներին մոբիլիզացիայի կոչ է արել։ Նա հայտարարել է, որ Հայաստանն այսօր ունի «ներքին թշնամի», որը բացում է երկրի դռները Ադրբեջանի առջև և վարում է մի քաղաքականություն, որը Հայաստանը վերածում է «Արևմտյան Ադրբեջանի»։
Հետևեք մեզ Viber-ում
