Կմարսի՞ Ալիևյան կլանը նոր հանցագործությունը

Հունվար 12-ին Բաքվից ստացված հաղորդագրության համաձայն, դատարանը լրագրող Աֆղան Մուխթարլիին դատապարտեց 6 տարվա ազատազրկման: Մեղադրյալը Մուխթարլիի համար 8 տարվա ազատազրկում էր պահանջել: Լրագրողը մեղադրվել է սահմանն ապօրինի հատելու, մաքսանենգ ճանապարհով դրամական միջոցներ փոխադրելու և պաշտոնյաներին վիրավորելու համար: Մինչդեռ ադրբեջանցի և օտարերկրացի իրավապաշտպանները հայտարարել են, որ ընդդիմադիր լրագրողին ներկայացված մեղադրանքների հիմքում բացառապես քաղաքական դրդապատճառներ են: Կրկին բացահայտ հետապնդում ալիևյան կլանի կողմից ընդդիմադիր լրագրողի հանդեպ, այն դեպքում, երբ այդ երկրում այլևս քննադատող լրագրող չի մնացել, բոլորը կամ հեռացել են երկրից, կամ՝ ճաղերի հետևում են: Մուխթարլին իր կնոջ՝ Լեյլայի հետ, 2015 թվականին ապաստանել է Թբիլիսիում, 2017-ի մայիսին Վրաստանի իրավապահները նրան հանձնել են ադրբեջանցիներին, ինչը Վրաստանում բողոքի մեծ ալիք է բարձրացրել: Ադրբեջանցի լրագրող Աֆղան Մուխթարլիի ազատազրկման դատավճիռը լրջագույն հարցեր է առաջացնում Ադրբեջանում հիմնարար ազատությունների, այդ թվում՝ ազատ խոսքի և իրավական գործընթացների հետ կապված, այս մասին օրերս հայտարարել է Եվրամիության արտաքին դիվանագիտական գերատեսչությունը: Արևմտյան երկրներն ու իրավապաշտպան կազմակերպությունները խստորեն դատապարտել են Ալիևի վարչակազմի որդեգրած՝ իշխանություններին քննադատող կամ կառավարության գործունեության օրինականությունը կասկածի տակ դնող անձանց պատժելու քաղաքականությունը: «Վրաստանում Մուխթարլիի ենթադրյալ առևանգումը և Ադրբեջանում նրա կալանքն ու դատական հետապնդումը պետք է մանրակրկիտ և թափանցիկ հետաքննվեն»,- ասվում է Եվրամիության դիվանագիտության ղեկավար Ֆեդերիկա Մոգերինիի գրասենյակի կողմից տարածված հայտարարության մեջ: Մուխթարլին կնոջ՝ Լեյլա Մուստաֆաևայի հետ հարևան Վրաստան էր տեղափոխվել 2015-ին, հայրենիքում լրագրողների և իրավապաշտպանների նկատմամբ համատարած ճնշումների պայմաններում, մտավախություն ունենալով, որ ինքը ևս կարող է ճաղերի ետևում հայտնվել՝ Ալիևների կոռուպցիոն գործունեության բացահայտումների մասին հրապարակումների պատճառով: Անցյալ տարվա մայիսին Մուխթարլին Վրաստանի մայրաքաղաքում անհետացել էր, քիչ ավելի ուշ պարզվել էր, որ նա Բաքվի բանտերից մեկում է՝ մաքսանենգության և սահմանն ապօրինի խախտելու կասկածանքով: Մուխթարլիի փաստաբանները պնդում են, որ լրագրողին Վրաստանում առևանգել են և ապօրինի կերպով տեղափոխել Ադրբեջան: Ինքը՝ լրագրողը չի ընդունում իրեն առաջադրված մեղադրանքները, համոզմունք հայտնելով, որ բանտում է հայտնվել լրագրողական գործունեության պատճառով: Անցյալ շաբաթ դատարանում իր եզրափակիչ խոսքում նա հայտարարել է, թե շարունակելու է իր գործը: «Նախագահ Ալիևի կառավարությունը չի կարող լռեցնել մեզ»,- հայտարարել է նա, ու հավելել․ «Դուք կարող եք մեզ ձերբակալել, սպանել, բայց կգան ուրիշները և կշարունակեն պայքարը»: Լրագրողին ազատ արձակելու՝ միջազգային իրավապաշտպան կառույցների ու արևմտյան երկրների՝ մայիսից ի վեր հնչեցրած կոչերն արդյունք չեն տվել: Մուխթարլիի դեմ հարուցված քրգործը կարճելու կոչով են հանդես եկել նաև Եվրախորհրդարանի պատգամավորները, սակայն Ադրբեջանի իշխանությունները անտեսել են նաև այդ հորդորը: ԱՄՆ պետքարտուղարության խոսնակ Հիթեր Նաուերթն օրերս հայտարարել է, թե պաշտոնական Վաշինգտոնը մտահոգված է Մուխթարլիի դատավճռով, ընդգծելով, որ այդ գործը քաղաքական դրդադապատճառներ ունի: Հիթեր Նաուերթը հավելել է՝ Միացյալ Նախանշաններն ուշի ուշով հետևում է, թե ինչպես է Վրաստանը հետաքննում Մուխթարլիի առևանգման գործը: Իսկ ԵԱՀԿ մամուլի ազատության հարցերով ներկայացուցիչ Արլեմ Դեզիրը նույնպես անդրադառնալով այս թեմային՝ նշել է. «Կեղծ մեղադրանքներով հետաքննող լրագրողի ազատազրկումը հստակ հարձակում է մամուլի ազատության վրա: Անկախ լրագրողներին լռեցնելը երբեք չի ընդունվի: Հույս ունեմ՝ վերաքննիչ ատյանը այս դատավճիռը չեղյալ կհամարի»: Ավելի վաղ նա Ադրբեջանի իշխանություններին կոչ էր արել դադարեցնել Աֆղան Մուխթարլիի նկատմամբ քրեական հետապնդումը և հարգել ազատ արտահայտվելու նրա իրավունքը: Մետաքսյա Շալունց