Միջադեպ՝ Հայելի ակումբում ասուլիսի ժամանակ

Երևանի ավագանու «Ելք» խմբակցության անդամ Արայիկ Հարությունյանը և ԳԽ նախկին պատգամավոր Ազատ Արշակյանն այսօրվա մամուլի ասուլիսի ժամանակ  լեզվակռվի մեջ  մտան և իրար մեղադրեցին հարմարվողականության և ընտրության արդյունքներն ընդունելու մեջ: «Բոլոր նրանք, ովքեր հաշվի են նստում ստեղծված իրականության հետ, քարտ-բլանշ են տալիս իշխանությանը: Խորհրդարանական ընտրությունների ժամանակ ավելի շատ համակրում էի «Ելք» դաշինքին, բայց հրավեր ստացա ՕՐՕ-ի կողմից: Ես պատրաստ եմ եղել նաև «Ելքին» սատարել, բայց նրանց կողմից հրավեր չի եղել։ Ես փորձել եմ իմ ընդհանուր ծանոթների միջոցով համագործակցություն ստեղծել, որ «Ելքի» դեմ չլինեմ»,-  նման հայտարարությամբ հանդես եկավ Ազատ Արշակյանը: Ի պատասխան Արայիկ Հարությունյանն ասաց. «Ձեր քաղաքական գործիչների սերունդը միշտ պատրաստ է հողմաղացների դեմ պայքարել: Ներկա իրավիճակի հետ հաշվի չնստել` նշանակում է՝ քսանհինգ տարի ձեր տիպի քաղաքական գործիչներով հողմաղացների դեմ պայքարել»։ Արշակյանն ասաց, որ «Ելքը» պետք է բարեփոխում աներ, քանի որ դրա անվանումն էլ է բարեփոխում ենթադրում, սակայն միայն թատերական իմաստով են ճիշտ անուն ընտրել։ Ազատ Արշակյանը, խոսելով «Ելքի» հրավիրած երթի մասին, ասաց, որ կասկածներ ունի, որ «Ելքը» կարող է ռազմաճակատը լքել, քանի որ ճանաչել են Ազգային ժողովի լեգիտիմությունը. «Երթի օրակարգը դեռևս ձևավորման մեջ է: Այն հայտարարությունը, որ եղել է «Ելքի» կողմից, դա կասկածելի էր, մենք չգիտեինք, թե մեզ ուր են տանելու: Հիմա էլ այս բանավեճը ցույց է տալիս, որ հստակ չեն ձևակերպել իրենց պայքարը. ուր հրավիրում են քաղաքացիներին` վտանգավոր  է, կասկածելի է, վստահություն չկա»։   Մանրամանսերը  տեսանյութում.