Al Jazeera․ Թրամփին փոխանցված Իրանի ծրագիրը բաղկացած է երեք փուլից

Al Jazeera հեռուստաալիքը նոր մանրամասներ է հրապարակել Իրանի վերջին խաղաղության առաջարկի մասին, որը նա Պակիստանի միջոցով փոխանցել է ԱՄՆ-ին։

Աղբյուրները հայտնել են, որ իրանական ծրագիրը բաղկացած է երեք հիմնական փուլից և նպատակ ունի 30 օրվա ընթացքում հրադադարը վերածել պատերազմի դադարեցման։

Այն նախատեսում է չհարձակման պարտավորություն, այդ թվում՝ Իսրայելի կողմից, որպեսզի կանխվի պատերազմի վերսկսումը և վերջ դրվի ռազմական գործողություններին ամբողջ Մերձավոր Արևելքում։

Առաջին փուլը նախատեսում է Հորմուզի նեղուցի աստիճանական բացում և Իրանի նավահանգիստների նկատմամբ ԱՄՆ-ի շրջափակման վերացում։ Թեհրանը ստանձնում է ծովային ականների դեմ պայքարի պատասխանատվությունը։

Առաջարկի երկրորդ փուլը նախատեսում է սահմանված ժամկետի ավարտից հետո Իրանի վերադարձը ուրանի հարստացմանը՝ 3,6 տոկոսի մակարդակով՝ «զրոյական պահեստավորման սկզբունքի» համաձայն։

Հեռուստաալիքի տեղեկություններով՝ ծրագիրը նախատեսում է, որ ԱՄՆ-ն ու Իսրայելը ձեռնպահ կմնան Իրանի և նրա դաշնակիցների վրա հարձակումներից՝ փոխարենը, Իրանը պետք է ձեռնպահ մնա հարվածներ հասցնելուց։

Առաջարկում մերժվում է միջուկային ենթակառուցվածքի ապամոնտաժումը կամ Իրանի օբյեկտների ոչնչացումը։

Պատժամիջոցների վերացումը ենթադրում է սառեցված միջոցների աստիճանական ապաշրջափակում։

Երրորդ փուլում Թեհրանը առաջարկել է սկսել ռազմավարական երկխոսություն արաբ հարևանների հետ և ստեղծել անվտանգության համակարգ, որը կընդգրկի ամբողջ Մերձավոր Արևելքը։

Ավելի վաղ Al Arabiya-ն հայտնել էր, որ Իրանը իր առաջարկում համաձայնել է ներառել միջուկային հարցը։

Իր հերթին Tasnim-ը հայտնել էր, որ Իրանը ԱՄՆ-ին է փոխանցել 14 կետից բաղկացած առաջարկ։

Ավելի ուշ իսրայելական Kan լրատվամիջոցի լրագրող Նաթան Գուտմանը հայտնել է, որ Թրամփը իր հետ զրույցում ասել է, թե Իրանի առաջարկն անընդունելի է համարում։